नवी दिल्ली: जो बायडेन आणि कमला हॅरिस यांचे बिहार कनेक्शन ? हैराण झालात ना ? त्यातल्या त्यात कमला हॅरिस या मूळ भारतीय वंशाच्या असल्याने त्यांचे समजू शकतो. पण, जो बायडेन यांचा आणि बिहारचा काय संबंध अशा प्रश्न नक्कीच पडला असेल. चला तर जाणून घेऊया. अमेरिकेच्या राष्ट्रपतीपदाच्या निवडणुकीत विजयी झाल्यानंतर जो बायडेन यांची सोशल मीडियावर चांगलीच चर्चा आहे. तर उपराष्ट्रपतीपदी निवडून आलेल्या कमला हॅरिस यांची भारतात चर्चा आहे. हॅरिस यांचे वडील डोनाल्ड हॅरिस हे जमैकाचे तर आई श्यामला गोपालन भारतातील तामिळनाडूतील. यामुळे त्यांचा संबंध तामिळनाडूशी जोडला जातो. दरम्यान, सोशल मीडियावर या निवडणुकीसंदर्भात अनेक मजेशीर पोस्ट पडत आहेत. त्यातीलच एक मजेशीर पोस्ट अभिनेता रितेश देशमुख याची आहे. आपल्या या पोस्टमध्ये त्याने बायडेन आणि हॅरिस यांचे बिहार कनेक्शन सांगितले आहे. हे पाहून तर सगळेच नेटीझन हैराण झाले. पण रितेश यांनी पोस्टमध्ये ते सिद्ध करून दाखवले आहे. त्यांच्या पोस्टमधील फोटोनुसार बायडेन आणि हॅरिस यांच्या आडनावांची अनुक्रमे पहिली दोन आणि तीन अक्षरे घेतली तर बिहार हे नाव तयार होते. यामुळेच या दोघांचे बिहार कनेक्शन असल्याचे या पोस्टमध्ये म्हटले आहे. अशाचप्रकारच्या अनेक गंमतीशीर पोस्ट सध्या फिरत आहेत.
