न्यूयॉर्क ः अॅमेझॉनचे मालक जेफ बेझॉस यांची घटस्फोटीत पत्नी मॅकेंझी स्कॉट पुन्हा एकदा विवाहबंधनात अडकल्या आहेत. मॅकेंझी यांनी त्यांच्या मुलांच्या शाळेतील शिक्षक डॅन जुएट यांच्यासोबत लग्न केलं आहे.
मॅकेंझी स्कॉट या लेखिका आणि समाजसेविका आहेत. २५ वर्षांच्या संसारानंतर जुलै २०१९ मध्ये मॅकेंझी स्कॉट आणि अॅमेझॉनचे मालक जेफ बेझॉस यांचा घटस्फोट झाला होता. मॅकेंझी यांची ५३ बिलियन डॉलर म्हणजेच अंदाजे ३ लाख ८६ हजार ६३७ कोटी रुपये इतकी संपत्ती आहे.
५० वर्षीय मॅकेंझी स्कॉट यांनी डॅन जुएट यांच्याशी लग्न केलं आहे. डॅन हे सिएटलमधील एका खासगी शाळेत विज्ञान शिक्षक आहेत. मॅकेंझी स्कॉट डॅनसोबत कधीपासून रिलेशनशीपमध्ये होत्या, त्यांनी लग्न कधी केलं याबाबत माहिती मिळू शकली नाही. मॅकेंझी सिएटलमध्ये पती डॅन आणि चार मुलांसोबत राहतात. अॅमेझॉनचे मालक जेफ बेझॉस यांनीही दोघांना लग्नाच्या शुभेच्छा दिल्या आहेत. डॅन हा उत्तम व्यक्ती आहे. डॅन आणि मॅकेंझी यांना एकत्र पाहून मला आनंद झाला आहे, अशा भावना बेझॉसनी व्यक्त केल्या आहेत.
घटस्फोटानंतर दोघांमध्ये ३८०० कोटी डॉलर म्हणजेच २.६० कोटींपेक्षा अधिक रकमेचा करार झाला. कंपनीचे चार टक्के भागिदारीही त्यांना मिळाली. त्या अचानक जगातील सर्वात श्रीमंत व्यक्तिंच्या यादीत २२ व्या क्रमांकावर आल्या होत्या.
