नवी दिल्ली – बर्फवृष्टी, चक्रीवादळे, गारपीट, मुसळधार पाऊस, विजा कोसळणे, कडक्याची थंडी या सारख्या प्रतिकुल हवामानाचा मानवी जीवनावर नेहमीच विपरित परिणाम होतो. गेल्या वर्षी आपल्या देशात अत्यंत प्रतिकूल हवामानामुळे सुमारे १५०० पेक्षा जास्त जणांचा बळी गेला आहे. तशी माहिती भारतीय हवामान खात्याने दिली.
हवामान विभागाच्या अहवालानुसार, मागील वर्षी ३६५ दिवसांच्या कालावधीत मेघगर्जनेसह, वीज कोसळण्यासारख्या घटनांमध्ये ८१५ लोक मरण पावले. तर पूर, चक्रीवादळे, विजांचा कडकडाट आणि शीतलहरीमुळे बिहारमध्ये सर्वाधिक ३७९ मृत्यू तर उत्तर प्रदेशात ही संख्या ३५६ आहे.
आकडेवारी माध्यमांच्या अहवालांवर आधारित आहे. देशाच्या विविध भागात मुसळधार पाऊस आणि पूर-संबंधित घटनांमध्ये ६०० हून अधिक लोक मरण पावले. आसाममध्ये १२९ , केरळमध्ये ७२ तेलंगणात ६१, बिहारमध्ये ५४, महाराष्ट्रात २३ उत्तर प्रदेशात ४८ आणि हिमाचल प्रदेशात ३८ जणांचा मृत्यू झाला. तसेच वादळ आणि वीज कोसळल्याने ८१५ लोकांचा मृत्यू झाला. त्याचबरोबर, सन १९०१ नंतर आठव्यांदा २०२० या वर्षी सर्वात अधिक उष्णता होती. परंतु २०१६ च्या उन्हाळ्यापेक्षा थोडे कमी तपमान होते. सन २०२० मध्ये देशातील वर्षाकाठी सरासरी वार्षिक तापमान सामान्यपेक्षा ०.२९ अंश सेल्सिअस होते.
