चंद्रपूर – येथील जगप्रसिद्ध ताडोबा-अंधारी व्याघ्र प्रकल्पातील पर्यटन सफारी दिनांक १ ऑक्टोंबर पासून नियमीतपणे सुरु करण्यात येत आहे. या पर्यटनाची सुरुवात राज्य सरकार व राष्ट्रीय व्याघ्र संरक्षण प्राधिकरण यांच्या निर्देशानुसार होणार असल्याची माहिती व्याघ्र प्रकल्पाचे क्षेत्र संचालक डॉ. जितेंद्र रामगावकर यांनी दिली आहे. कोरोनाचा वाढता प्रादुर्भाव पाहता व्याघ्र प्रकल्पातील सफारी देखील बंद करण्यात आली होती. परंतु आता व्याघ्रप्रेमींना पर्यटन सफारीचा आनंद लुटता येणार आहे. शासनाच्या सर्व नियमाचे पालन करून व्याघ्र प्रकल्प सुरु करत असल्याचे रामगावकर यांनी स्पष्ट केले आहे.
यांनाच मिळणार प्रवेश
ओपन जिप्सी वाहनात एक वाहनचालक, एक मार्गदर्शक व चार पर्यटक एवढ्याच व्यक्तींना प्रवेश दिला जाणार आहे. तसेच दहा वर्षांखालील व ६५ वर्षांवरील व्यक्तींना तसेच गर्भवती महिलांना पर्यटनासाठी प्रवेश दिला जाणार नसल्याचे नमूद करण्यात आले आहे. सोशल डिस्टन्सिंगच्या नियमाचे पालन करणे प्रत्येकास बंधनकारक असणार आहे. प्रवेशद्वारातून पर्यटकास प्रवेश देण्यापूर्वी सर्व पर्यटक, जिप्सी चालक, मार्गदर्शक यांचे शरीराचे तापमान थर्मर स्क्रिनींग, ईन्फ्रारेड थर्मामीटरने तपासले जाणार आहे. ताप, सर्दी, खोकला असलेल्या कोणालाही प्रवेश दिला जाणार नाही. तसेच अशी लक्षणे असलेली व्यक्ती आढळून आल्यास संबंधित माहिती नजिकच्या कोविड रुग्णालयात दिली जाणार आहे. मास्क शिवाय कोणत्याही सफारीसाठी प्रवेश दिला जाणार नाही. पर्यटक वाहनात बसण्यापूर्वी सॅनिटायझरने हात निर्जंतुक करणे बंधनकारक असणार आहे. जिप्सीधारकांनी देखील प्रवेशद्वारावर येण्यापूर्वी जिप्सीची साफसफाई व सॅनिटाईजेशन करणे आवश्यक असल्याचे स्पष्ट करण्यात आले आहे.
येथे करा ऑनलाईन आरक्षण
पर्यटकांकरीता ऑनलाईन आरक्षणाची सुविधा www.mytadoba.org संकेतस्थळावर आज (१६ सप्टेंबर) पासून उपलब्ध करुन देण्यात आलेली आहे. यामध्ये बफर क्षेत्रातील विविध अँक्टिव्हिटीचे आरक्षण पर्यटकांना ऑनलाईन प्रणालीद्वारे करता येणार आहे. पर्यटन शुल्कामध्ये कोणताही बदल करण्यात आलेला नाही. पूर्वीप्रमाणे पर्यटनाचे दार आकारले जाणार आहे. पर्यटनाबाबत अधिक माहिती करीता ०७१७२-२७७११६ व ७५८८०६३४६३ या दूरध्वनी क्रमांकावर संपर्क करावा.
