गांधीनगरला महिलेचे मंगळसूत्र खेचले; पळसेत काका-पुतण्यांना मारहाण

नाशिक –  दुचाकीस्वार भामट्यांनी रस्त्याने पायी जाणाऱ्या महिलेच्या गळ्यातील मंगळसूत्र ओरबाडून नेले. ही घटना गांधीनगर येथील शिवाजीनगर भागात घडली. याप्रकरणी उपनगर पोलीस ठाण्यात जबरीचोरीचा गुन्हा दाखल करण्यात आला आहे.
पोलिसांनी दिलेल्या माहितीनुसार, मनिषा भाऊसाहेब पाटील (रा.तोरणा सोसा.जनता शाळेजवळ) यांनी याप्रकरणी तक्रार दाखल केली आहे. पाटील या गुरूवारी (दि.२५) सायंकाळी भाची प्रणाली भदाणे यांच्या सोबत घेवून दुध घेवून रस्त्याने घराकडे पायी जात असतांना ही घटना घडली. मोठी जनता शाळेकडून कॉलनी रस्त्याने मामी आणि भाची एन.के.नगरच्या दिशेने पायी जात असतांना दुचाकीवर आलेल्या भामट्यांनी मामीच्या गळ्यातील सुमारे २५ हजार रूपये किमतीचे मंगळसुत्र ओरबाडून नेले. अधिक तपास उपनिरीक्षक चव्हाण करीत आहेत.

—
दुचाकी घसरल्याने एक ठार
नाशिक – भरधाव दुचाकी घसरल्याने ३७ वर्षीय मोटारसायकल स्वाराचा मृत्यु झाला. हा अपघात सामनगाव रोडवरील तानाजीनगर भागात झाला. याप्रकरणी नाशिकरोड पोलीस ठाण्यात मृत्युची नोंद करण्यात आली आहे.
धनीराम राजाराम शर्मा (रा.तानाजीनगर) असे मृत दुचाकीस्वाराचे नाव आहे. शर्मा गुरूवारी (दि.२५) कामानिमित्त घराबाहेर पडले होते. सायंकाळच्या सुमारास ते आपल्या दुचाकीवर घराकडे जात असतांना हा अपघात झाला. घरानजीक भरधाव दुचाकी घसरल्याने ते गंभीर जखमी झाले होते. कुटूंबियांनी त्यांना तातडीने जिल्हारूग्णालयात दाखल केले असता वैद्यकीय सुत्रांनी मृत घोषीत केले. अधिक तपास हवालदार उजागरे करीत आहेत.

—

मारहाणीत काका पुतणे जखमी
नाशिक – टोळक्याच्या मारहाणीत काका पुतणे जखमी झाल्याची घटना पळसे ता.जि.नाशिक येथे घडली. या घटनेत पुतण्याची सोनसाखळी गहाळ झाली असून याप्रकरणी नाशिकरोड पोलीस ठाम्यात सात जणांविरूध्द मारहाणीचा गुन्हा दाखल करण्यात आला आहे.
नवनाथ अंबादास गायधनी,धनंजय अरूण गायधनी,बाजीराव भागवत गायधनी,गोपाळा कचरू गायधनी,खंडू काशिनाथ गायधनी,सोपान दत्तू गायधनी व ज्ञानेश्वर भागवत गायधनी (रा.सर्व पळसे) अशी मारहाण करणाºया संशयीतांची नावे आहेत. याप्रकरणी साहेबराव तानाजी गायधनी (रा.कृषीनगर,पळसे) यांनी तक्रार दाखल केली आहे. साहेबराव गायधनी यांचे चुलते ज्ञानेश्वर खंडेराव गायधनी हे बुधवारी (दि.२४) पळसे ग्रामपंचायत कार्यालया समोर उभे असतांना संशयीत टोळक्याने त्यांना शिवीगाळ करीत अज्ञात कारणातून बेदम मारहाण केली. यावेळी साहेबराव गायधनी व त्यांचा भाऊ रावसाहेब गायधनी आपल्या काकाच्या बचावासाठी धावून गेले असता संशयीतांनी दोघा भावांनाही मारहाण केली. या घटनेत काका पुतणे जखमी झाले असून रावसाहेब यांच्या गळ््यातील सोनसाखळी तुटून गहाळ झाली आहे. अधिक तपास उपनिरीक्षक गांगुर्डे करीत आहेत.

—
हॉटेलच्या टेरेसवर एकाची आत्महत्या
नाशिक – हॉटेलच्या टेरेसवर ५० वर्षीय इसमाने गळफास लावून घेत आत्महत्या केली. सदर इसमाची अद्याप ओळख पटली नसून त्याच्या आत्महत्येचे कारणही गुलदस्त्यात आहे. याप्रकरणी भद्रकाली पोलीस ठाण्यात मृत्यूची नोंद करण्यात आली आहे.
जुने नाशिक परिसरातील तिगरानीया कॉर्नर येथील हॉटेल सिंग पॅलेस येथे गुरूवारी (दि.२५) ही घटना उघडकीस आली. टेरेसवरील सिमेंट पिलरच्या लोखंडी गजांना अनोळखी इसमाने अज्ञात कारणातून दोरी बांधून गळफास लावून घेत आत्महत्या केली. ही बाब हॉटेल कर्मचाºयांच्या निदर्शनास आल्याने उघडकीस आली. याप्रकरणी राजेंद्र रावत या कर्मचाºयाने दिलेल्या खबरी वरून भद्रकाली पोलीस ठाण्यात नोंद करण्यात आली असून अधिक तपास जमादार ईशी करीत आहेत.