नाशिक – गंगापूर धरणाच्या जलाशयात लवकरच नौकाविहाराचा आनंद पर्यटकांना आणि स्थानिक नागरिकांना घेता येणार आहे, तशी माहिती जिल्हाधिकारी सूरज मांढरे यांनी दिली आहे. पहिल्या टप्प्यात ११ बोटी सुरू करण्याचा निर्णय महाराष्ट्र पर्यटन विकास महामंडळाने (एमटीडीसी) घेतला आहे.
आपत्कालीन व्यवस्थापनाच्या आवश्यकतेनुसार बोटींची सद्यस्थिती, सुरक्षा व सुरक्षाविषयक बाबींविषयी अहवाल प्राप्त झाला आहे. नौका चालविण्याबाबत त्यांना काही आक्षेप असल्यास आम्ही जलसंपदा विभागाकडे तपासणी करीत आहोत. त्यानंतर, गंगापूर धरणात जल क्रीडा आणि जल पर्यटनास परवानगी दिली जाईल, असे जिल्हाधिकाऱ्यांनी सांगितले आहे.
एमटीडीसी नाशिकचे प्रादेशिक अधिकारी जगदीश चव्हाण म्हणाले की, एमटीडीसीच्या ताब्यात असलेल्या सर्व मोटर बोट उत्तम दर्जाच्या आहेत. पाण्याचे प्रदूषण टाळण्यासाठी संबंधित एजन्सींकडून मंजुरी मिळाली आहे. याशिवाय, महाराष्ट्र मरीन बोर्डाच्या (एमएमबी) मार्गदर्शनाखालील नौका चालविणारे चालक असून त्यांना सिंधुदुर्गमधील तारकर्ली येथून स्कूबा डायव्हिंग व इतर सुरक्षाविषयक बाबींचे प्रशिक्षण दिले जाते, लोकांसाठी उपलब्ध असणाऱ्या बोटींमध्ये स्पीड बोट्स आणि पोंटूनच्या नौका यांचा समावेश आहे. हा बोट क्लब प्रकल्प पालकमंत्री छगन भुजबळ यांच्या संकल्पनेतून साकारण्यात आला आहे.
