जळगाव – भाजपमधून राष्ट्रवादी काँग्रेसमध्ये प्रवेश करणारे माजी मंत्री एकनाथ खडसे यांच्या पक्षांतरानंतर हळूहळू भाजपला खिंडार पाडत आहेत. खडसेसमर्थक पदाधिकारी आणि कार्यकर्ते राष्ट्रवादी काँग्रेसमध्ये प्रवेश करू लागले आहेत. भुसावळमधील ३१ आजी-माजी नगरसेवकांनी राष्ट्रवादी काँग्रेसचं घड्याळ हातात बांधलं आहे, यामध्ये १८ विद्यमान आणि १३ माजी नगरसेवकांचा समावेश आहे.
सरदार वल्लभभाई पटेल सभागृहात राष्ट्रवादी काँग्रेसचे प्रदेशाध्यक्ष जयंत पाटील यांच्या उपस्थितीत प्रवेश सोहळा झाला. काही महिन्यांपूर्वी राष्ट्रवादी काँग्रेसमध्ये प्रवेश केल्यानंतर एकनाथ खडसे यांच्यामागे ईडीकडून चौकशीचा ससेमीरा लागला होता. दुसरीकडे मला जितकं छळाल, तितकं भाजपला महागात पडेल, असा इशारा खडसे यांनी दिला होता. त्यांचा हा इशारा सूचक मानला जात होता.
त्यानंतर काही दिवसांनी त्यांनी भाजपला मोठा धक्का दिला. राष्ट्रवादी काँग्रेसमध्ये प्रवेश करणार्यामंध्ये भाजपचे जिल्हा सरचिटणीस प्रा. डॉ. सुनील नेवे, नगराध्यक्ष रमण भोळे यांच्या पत्नी भारती भोळे, नगरसेविकेचे पती देवा वाणी, भाजपचे माजी अध्यक्ष दिनेश नेमाडे आणि इतर नेत्यांचा समावेश आहे.
अनेकांनी सांगितलं होतं
राष्ट्रवादी काँग्रेसमध्ये प्रवेश केल्यानंतर माझ्या मागे ईडी लागू शकते असं जयंत पाटील यांच्यासह अनेकांनी मला सांगतिलं होतं. माझ्या मागे ईडी लावली तर मी सीडी लावेन असं म्हटल्याची आठवड श्री. खडसे यांनी करून दिली. प्रत्यक्षात माझ्या मागे ईडी लावल्यानं मी आता सीडी लावणार आहे, असा इशाराच खडसे यांनी दिला आहे. कार्यकर्ते भाजप सोडत आहेत, त्यांच्या मनात असुरक्षितता आहे. इतकं करूनही मला न्याय मिळाला नाही. मला तुरुंगात टाकण्याचा प्रयत्न केला जात आहे. परंतु आयुष्यात मी दोन नंबरचे धंदे केले नाही, असं त्यांनी स्पष्ट केलं.
