दुचाकीस्वार महिलेचा मोबाईल पळविला
नाशिक : दवाखान्यातून घराकडे परतणा-या दुचाकीस्वार महिलेच्या हातातील मोबाईल भामट्यांनी हिसकावून पोबारा केल्याची घटना पेठरोड भागात घडली. याप्रकरणी पंचवटी पोलीस ठाण्यात जबरीचोरीचा गुन्हा दाखल करण्यात आला आहे. मनिषा मनोज शर्मा (रा.आरटीओ जवळ,पेठरोड) यांनी याप्रकरणी तक्रार दाखल केली आहे. शर्मा बुधवारी (दि.७) दवाखान्यात गेल्या होत्या. अ‍ॅक्टीव्हा दुचाकीने त्या आपल्या घराकडे परतत असतांना ही घटना घडली. वाटेत फोन आल्याने त्या वज्रेश्वरी झोपडपट्टी परिसरातील पाटा जवळ रस्त्याच्या कडेला दुचाकी उभी करून बोलत असतांना भामट्यांनी मोबाईल पळविला. पाठीमागून मोटारसायकलवर आलेल्या दोघांपैकी एकाने त्यांच्या हातातील मोबाईल बळजबरीने हिसकावून पोबारा केला. अधिक तपास उपनिरीक्षक कासर्ले करीत आहेत.
……
बँक ग्राहकाच्या खात्यावर भामट्यांचा डल्ला
नाशिक : एटीएम कार्डची माहिती मिळवित भामट्यांनी एकाच्या बँक खात्यातील ८५ हजाराच्या रोकडवर डल्ला मारल्याची घटना नुकतीच उघडकीस आली. क्लोनिंगद्वारे ही रक्कम आॅनलाईन लांबविण्यात आली असून याप्रकरणी सायबर पोलीस ठाण्यात फसवणुक आणि आयटी अ‍ॅक्ट नुसार गुन्हा दाखल करण्यात आला आहे. हरिश ओमप्रकाश भाबड (रा.निळकंठ अपा.हिरावाडी) यांनी याप्रकरणी तक्रार दाखल केली आहे. भाबड यांचे पंजाब नॅशनल बँकेत खाते आहे. १३ जानेवारी रोजी अज्ञात भामट्यांनी त्यांच्या एटीएम कार्डचा डाटा चोरला. त्यानंतर क्लोनिंगद्वारे नवीन डेबीट कार्डचा वापर करून खात्यातील ८५ हजाराची रोकड आॅनलाईन लांबविली. अधिक तपास निरीक्षक श्रीपाद परोपकारी करीत आहेत.
..
अज्ञात वाहनाच्या धडकेत एक ठार
नाशिक : भरधाव अज्ञात वाहनाने दिलेल्या धडकेत ४५ वर्षीय पादचारी ठार झाला. हा अपघात पुणा रोडवरीलल शिंदे गाव येथील महामार्गाच्या सर्व्हीस रोडवर झाला. याप्रकरणी नाशिकरोड पोलीस ठाण्यात अपघाताचा गुन्हा दाखल करण्यात आला आहे. शिवाजी त्र्यंबक खेडेकर (४५ रा.मराठी शाळे मागे,शिंदे गाव) असे अपघातात ठार झालेल्या इसमाचे नाव आहे. खेडेकर बुधवारी (दि.७) रात्री शिंदेगाव येथील उड्डाणपुला शेजारील जनलक्ष्मी बँके समोरून सर्व्हीस रोडने आपल्या घराकडे पायी जात असतांना हा अपघात झाला. नाशिकरोड कडून सर्व्हीसरोडने टोल नाक्याच्या दिशेने भरधाव जाणा-या अज्ञात वाहनाने त्यांना धडक दिली. या अपघातात वाहनाचे चाक खेडेकर यांच्या डोक्यावरून गेल्याने त्यांचा जागीच मृत्यु झाला. याप्रकरणी त्यांचे भाऊ भिकाजी खेडेकर यांनी दिलेल्या तक्रारीवरून अज्ञात वाहनचालकाविरूध्द गुन्हा दाखल करण्यात आला असून अधिक तपास सहाय्यक निरीक्षक कंडारे करीत आहेत.
……
अशोकनगरला तरूणाची आत्महत्या
नाशिक : औद्योगीक वसाहतीतील अशोकनगर भागात राहणा-या ३५ वर्षीय तरूणाने आपल्या राहत्या घरात गळफास लावून घेत आत्महत्या केली. युवकाच्या आत्महत्येचे कारण स्पष्ट होवू शकले नाही. याप्रकरणी सातपूर पोलीस ठाण्यात मृत्युची नोंद करण्यात आली आहे. संदिप प्रकाश पाटील (३५ रा.राधाकृष्ण नगर,अशोकनगर) असे आत्महत्या करणा-या युवकाचे नाव आहे. पाटील यांनी गुरूवारी (दि.८) अज्ञात कारणातून आपल्या राहत्या घरात छताला असणा-या लोखंडी हुकाला दोरी बांधून गळफास लावून घेतला होता. त्यात त्याचा मृत्यु झाला. अधिक तपास पोलीस नाईक सोनवणे करीत आहेत.
…..
ट्रकसह दुचाकी चोरी
नाशिक : शहरात वाहनचोरीची मालिका सुरू असून पार्क केलेला मालट्रकसह चोरट्यांनी दुचाकी चोरून नेली. वेगवेगळ्या भागात घडलेल्या या घटनाप्रकरणी अंबड आणि सातपूर पोलीस ठाण्यात गुन्हा दाखल करण्यात आला आहे.
सिडकोतील पवननगर भागात राहणारे विलास सुकदेव पाटील यांची मोटारसायकल एमएच १५ एचई ९८३४ मंगळवारी (दि.६) रात्री त्यांच्या घरासमोर पार्क केलेली असतांना चोरट्यांनी पळवून नेली. याप्रकरणी अंबड पोलीस ठाण्यात गुन्हा दाखल करण्यात आला असून अधिक तपास पोलीस नाईक महाजन करीत आहेत. दुसरी घटना सातपूर औद्योगीक वसाहतीत घडली. आडगाव नाका भागात राहणारे हरप्रितसिंग बलोते यांनी याप्रकरणी तक्रार दाखल केली आहे. बलोते यांनी दोन लाख रूपये किमतीचा आपला मालट्रक पीबी ६५ एडब्ल्यू १८८७ औद्योगीक वसाहतीतील व्हिक्टर पॉईंट भागात रस्त्याच्या कडेला उभा केलेला असतांना चोरट्यांनी मालट्रक चोरून नेला. याप्रकरणी सातपूर पोलीस ठाण्यात गुन्हा दाखल करण्यात आला असून अधिक तपास पोलीस नाईक आव्हाड करीत आहेत.
……..
नाशिकरोडला पिस्तूलधारी जेरबंद
नाशिक : विनापरवाना पिस्तूल बाळगणा-या एकास उपनगर पोलीसांनी बेड्या ठोकल्या. संशयीत गावठी कट्टा विक्री करण्याच्या उद्देशाने फिरत होता. याप्रकरणी उपनगर पोलीस ठाण्यात गुन्हा दाखल करण्यात आला आहे.
शुभम देविदास कांबळे (रा.श्रीकृष्ण नगर,अरिंगळे मळा) असे पिस्तूल बाळगणा-या संशयीताचे नाव आहे. शिखरेवाडी मैदान परिसरात पिस्तूल विक्रेता येणार असल्याची माहिती पोलीसांना मिळाली होती. त्यानुसार गुरूवारी (दि.८) रात्री मैदान भागात सापळा लावण्यात आला होता. संशयीताचा संशय आल्याने पोलीसांनी त्याची अंगझडती घेतली असता त्याच्या कडे गावठी पिस्तूल मिळून आला. अधिक तपास उपनिरीक्षक लोंढे करीत आहेत.
…….
उघड्यावर बेकायदा मद्यविक्री : एकास अटक
नाशिक : देशी दारूची बेकायदा उघड्यावर विक्री करणा-या संशयीतास पोलीसांनी बेड्या ठोकल्या. संशयीताच्या ताब्यातून मद्याचे खोके जप्त करण्यात आले असून याप्रकरणी अंबड पोलीस ठाण्यात गुन्हा दाखल करण्यात आला आहे.
धनजीत अंगद कलीता (रा.गणपती मंदिराजवळ,दत्तनगर) असे अटक केलेल्या संशयीताचे नाव आहे. कलीता गुरूवारी (दि.८) सायंकाळी दत्तनगर भागातील बैठ्याखल्या परिसरात मद्याची विक्री करीत असल्याची माहिती पोलीसांना मिळाली होती. त्यानुसार पोलीसांनी छापा टाकला असता संशयीत उघड्यावर अंब्याच्या झाडाखाली मद्यविक्री करतांना मिळून आला. त्याच्या ताब्यात खाकी खोक्यात ठेवलेल्या संत्रा या कंपनीच्या देशी दारूच्या बाटल्या हस्तगत करण्यात आल्या असून अधिक तपास हवालदार भड करीत आहेत.
….
