क्राईम डायरी – कुरापत काढत एकाला शिवीगाळ, मारहाण

कुरापत काढत एकाला शिवीगाळ, मारहाण
नाशिक – बॅनर बनविण्याच्या कारणातून कुरापत काढत तीनजणांनी एकाला शिवीगाळ व मारहाण केल्याची घटना रविवारी (दि.११) सारडा सर्कल, डीलक्स हॉटेलजवळ घडली. याप्रकरणी अन्वर शेख यांनी भद्रकाली पोलीस ठाण्यात तक्रार दाखल केली आहे. त्यानुसार पोलिसांनी अकमल अफजल शेख व त्याच्या दोन साथीदारांवर गुन्हा दाखल केला आहे. पोलिसांनी दिलेल्या माहितीनुसार, बॅनर बनविण्याच्या कारनावरुन कुरापत काढत तीनजणांनी शेख अन्वर यांना शिवीगाळ व मारहाण केली. या घटनेत शेख यांच्या हाताच्या बोटाला दुखापत झाली. पुढील तपास सहायक पोलीस निरीक्षक एस. एस. वर्‍हाडे करत आहेत.
….
कोयत्याचा धाक दाखवत मोबाईल हिसकावला
नाशिक : कोयत्याचा धाक दाखवत शिवीगाळ व दमदाटी करत तीनजणांनी एकाचा मोबाईल व रोकद हिसकावल्याची घटना सिद्धार्थनगर, महाराष्ट्र पोलीस अ‍ॅकेडमीमागे, कॉलेजरोड येथे घडली. याप्रकरणी अनिल महादेव कांबळे यांनी गंगापूर पोलीस ठाण्यात तक्रार दाखल केली आहे. त्यानुसार पोलिसांनी संशयित गटर्‍या ऊर्फ सुनील नागू गायकवाड (रा. सिद्धार्थनगर,पोलीस अ‍ॅकेडमीमागे) याच्यावर गुन्हा दाखल केला आहे. पोलिसांनी दिलेल्या माहितीनुसार, धारदार कोयत्याचा धाक दाखवत शिवीगाळ व दमदाटी करुन तीनजणांनी अनिल कांबळे यांचा मोबाईल, रोकड बळजबरीने हिसकावली. त्यानंतर तिघेजण फरार झाले. पुढील तपास पोलीस उपनिरीक्षक शेंडकर करत आहेत.

……..

नानावलीत घरफोडी
नाशिक : घरमालकाच्या गैरहजेरीत चोरट्याने घरातील टिव्ही, लॅपटॉप, एसी मशिनचे तांब्याचे पाईप लंपास केल्याची घटना दातार सोसायटी, ट्रॅक्टर हाऊस, नानावली येथे घडली. याप्रकरणी सुभान सलीम मलीक यांनी भद्रकाली पोलीस ठाण्यात तक्रार दाखल केली आहे. पोलिसांनी दिलेल्या माहितीनुसार, घराला कुलूप असल्याची खात्री करत चोरट्याने बाल्कनीचा कडीकोयंडा तोडून आत प्रवेश केला. घरातील लॅपटॉप, टिव्ही लंपास केला. पुढील तपास पोलीस हवालदार शिरोळे करत आहेत.