नाशिक – कोरोनाबाबतच्या नियमांचे पालन होत नसल्याने अशोका मेडीकव्हर हॉस्पिटलला महापालिकेने नोटीस बजावण्यात आली आहे. तशी माहिती अतिरीक्त आयुक्त सुरेश खाडे यांनी दिली आहे. महापालिकेच्या पथकाने हॉस्पिटलला अचानक भेट देऊन पाहणी केली.
आतिरीक्त आयुक्त खाडे यांनी दिलेल्या माहितीनुसार, शहरातील मोठ्या मोठ्या रुग्णालयांमध्ये बेड उपलब्ध होत नाहीत. तसेच सदरच्या मोठ्या रुग्णालयात मनपाच्या ८० टक्के आरक्षित जागेवर स्वतःचे पेशंट कोणतीही पूर्वसूचना न देता भरती करीत आहेत. एकूण सर्व उपलब्ध बेडची माहिती लपवत असल्याचे निदर्शनास येत आहे. त्यामुळे अशा अत्यंत हलाखीच्या कोविड-१९ च्या परिस्थितीमध्ये सर्व प्रकारचे बेड त्या त्या रुग्णांना वेळेत उपलब्ध होण्यासाठी नाशिक महानगरपालिकेच्या अधिकार्‍यांनी सर्व मोठ्या रुग्णालयांची तपासणी करण्याचे निश्चित केले आहे.
शहरातील खाजगी हॉस्पिटलची पाहणी करून कोरोनाबाबतच्या नियमांचे पालन केले जाते की नाही याबाबत पडताळणी मनपाच्या पथकाकडून केली जात आहे. या अनुषंगाने वडाळा रोड येथील अशोका मेडीकव्हर हॉस्पिटल येथे मा.अतिरिक्त आयुक्त सुरेश खाडे व मा.सहाय्यक आरोग्य वैद्यकीय अधिकारी डॉ. प्रशांत शेटे यांच्या पथकाने पाहणी केली.
याठिकाणी मनपाच्या सी बी आर एस सिस्टिम मध्ये कोविड रुग्णांची माहिती अपडेट केली जात नसून त्यामध्ये बरीच तफावत असल्याचे आढळून आले आहे. नाशिक मनपाच्या रिझर्व्ह बेड प्रमाणे कोविड रुग्णाची भरती मनपाच्या सी बी आर एस सिस्टिम वरून देण्यात येणाऱ्या टोकन प्रमाणे होत नसल्याचेही निदर्शनास येत आहे. रुग्णाच्या बिलावर ऑडिटरचा शेरा सही शिक्का नाही, तशी नोंद असलेली नस्ती मिळून आली नाही.
नाशिक मनपाच्या बिलाबाबतचा फलक हा रुग्णालयात दर्शनी भागात न लावता चुकीच्या जागी लावण्यात आलेला आहे. कोरोना रुग्ण दाखल करतेवेळी वैयक्तिक संरक्षक साधने सँनिटायझर, सोशल डिस्टंसिंग पाळले जात नसल्याचे आढळून आले. तसेच रुग्णालयात एकूण २११ खाटांवर रुग्ण दाखल होते. त्यामध्ये कोविडचे १५४ रुग्ण व नॉन कोविडचे ५७ रुग्ण दाखल होते.
शासनाच्या मार्गदर्शक सूचनांनुसार, रुग्णालयातील एकूण खाटांच्या ८० टक्के खाटा म्हणजे १८० खाटा कोविड रुग्णासाठी आरक्षित करण्यात याव्यात. तसेच या रुग्णालयात दाखल होणाऱ्या ८० टक्के कोविड रुग्णांची देयके आकारणी (बिल) शासनाच्या नियमानुसार घेण्यात यावी व त्याबाबत मनपास स्पष्टीकरण देण्याबाबत कळविण्यात आले आहे.
