नवी दिल्ली – दिल्लीसह देशाच्या सर्व भागांमध्ये कोरोनाचे संक्रमण वेगाने वाढत असल्याबद्दल अखिल भारतीय आयुर्विज्ञान संस्थान (एम्स)चे संचालक डॉ. रणदीप गुलेरिया यांनी चिंता व्यक्त केली आहे. लोकांच्या मनातील कोरोनाबद्दलची भिती नष्ट झाल्यामुळेच रुग्ण वाढत असल्याचा दावा त्यांनी केला आहे.
बाहेर फिरणे, शॉपिंगला जाणे शक्य नाही, याचे लोकांना दुःख आहे. त्यामुळे कोरोनापासून बचाव करण्यासाठी ज्या नियमांचे पालन आवश्यक आहे, ते नियम पाळणेच लोकांनी सोडून दिले, असेही ते म्हणाले.
अनेक लोकांनी तर मास्क लावणेच बंद करून दिले. कोरोना विषाणू कुठेच गेला नव्हता. त्यामुळे आपण गाफिल होताच त्याने पुन्हा आक्रमण केले. विषाणू जसा जसा वाढेल तसे तसे त्याचे नवे स्ट्रेन बनत राहतील, असा गंभीर इशारा डॉ. गुलेरिया यांनी दिला आहे.
सर्वांनी लस घ्यावी, असे आवाहन त्यांनी केले आहे. देशात ज्या ठिकाणी नवा स्ट्रेन आढळून आला आहे तिथे संक्रमण जास्त आहे. लोकांनी आपली जबाबदारी समजणे अत्यंत आवश्यक आहे. मास्क लावणे आणि गर्दी टाळणे या अत्यंत प्राथमिक जबाबदाऱ्या आहेत. त्यांचे तरी पालन केलेच पाहिजे.
आरटी–पीसीआर चाचणीचे प्रमाण वाढवणे आणि आयसोलेशनमध्ये राहणे या प्राथमिक उपायांवर प्रशासनाने लक्ष देणे आवश्यक असल्याचेही ते म्हणाले. गेल्या वर्षीप्रमाणे यंदाही कॅन्टॉन्मेंट एरिया घोषित करण्याची गरज असल्याचे त्यांनी सांगितले. सहा महिन्यांपूर्वी जे उपाय करण्यात आले होते, ते आता पुन्हा करावे लागतील, असे ते म्हणाले.
लस घ्याच
गुलेरिया यांनी सांगितले की, ४५ वर्षांवरील लोकांनी स्वतःहून पुढाकार घेत लस घेण्यास प्राधान्य द्यावे. संक्रमण झाले तरीही गंभीर आजारात रुपांतर होण्यापासून वाचता येईल. जुन्या आजारांनी ग्रस्त असलेल्यांना लस ही संक्रमणापासून वाचवू शकतो. त्यामुळे मृत्यूदर कमी होईल, असे गुलेरिया म्हणाले.
