नवी दिल्ली – कोरोनावर मात करण्यासाठी लस शोधून तिचा वापर करण्यासही सुरुवात झाली आहे. वारंवार आपले स्वरूप बदलणाऱ्या कोरोनावर उपाय शोधण्यासाठी खूप प्रयत्न सुरू असले तरी याचे समूळ उच्चाटन होणे शक्य नाही, असे शास्त्रज्ञांचे म्हणणे आहे. मात्र, कालांतराने त्याची तीव्रता कमी होत जाईल, आणि साधारण आजारासारखा तो आजार असेल. त्यामुळे आपल्याला कोरोनासोबत जगण्याची सवय लावून घ्यावी लागणार आहे.
एमोरी विद्यापीठातील विषाणूतज्ञ जेन्नी लेवाईन यांच्या मते, आज ज्यांना कोरोनाची लस दिली जात आहे, त्यांना भविष्यातही कोरोनाचा धोका आहेच. पण तेंव्हा तो केवळ सर्दी, खोकला अशा साध्या स्वरूपात असेल.
पोलिओ तसेच एचआयव्हीवर मात करण्यासाठी भारताने आखलेल्या मोहिमांमध्ये भारताला सहकार्य करणारे डॉ. जेकब जॉन सांगतात की, ज्या रोगांच्या सहाय्याने आपण जगणे शिकलो आहोत, अशा संसर्गजन्य रोगांमध्ये याचा समावेश होणार आहे. अर्थात याची काहीही खात्री नाही. कारण हा आजार वारंवार आपले स्वरूप बदलतो आहे, असेही त्यांनी स्पष्ट केले. तर कोलंबिया विद्यापीठातील डॉ. जेफ्री शमन यांच्या मते, एकदा कोरोनावरील लस घेतली की आयुष्यभर तुमचा त्याच्यापासून बचाव झाला, असे होणार नाही.
