चेन्नई – तमिळनाडूमध्ये द्रमुक आणि अण्णाद्रमुक पक्षांमध्ये खरी लढत असली तरी विरोधक उमेदवारच पंतप्रधान मोदी यांना आपल्या विरोधात प्रचारसभा घेण्याचे आव्हान करत आहेत. द्रमुक उमेदवारांकडून दिल्या जात असलेल्या उपहासात्मक पद्धतीने दिलेल्या या आव्हानाची सध्या सोशल मीडियावर जोरदार चर्चा आहे.
विधानसभा निवडणुकीत पंतप्रधान मोदींनी भाजप किंवा अण्णाद्रमुकच्या उमेदवारांचा प्रचार करावा, जेणेकरून आमच्या मताधिक्यात वाढ होईल, असा टोमणा पंतप्रधानांना ट्विटरवर टॅग करून काही उमेदवारांनी मारला आहे. विशेषतः कुमबुम विधानसभा मतदारसंघातील द्रमुकचे उमेदवार एन. रामकृष्णा ट्विटरवर पंतप्रधान नरेंद्र मोदी यांना उद्देशून, ‘ तुम्ही कुम्बुम विधानसभेत प्रचार करा, मी येथे द्रमुकचा उमेदवार आहे. तुमच्या प्रचारामुळे माझे मताधिक्य वाढण्यास मदत होईल, असे आव्हान त्यांनी दिले आहे.
खुद्द पंतप्रधानांना आपल्या विरोधात प्रचार करण्याचे खुले आव्हान देऊन एन. रामकृष्णा यांनी सोशल मीडियावर खळबळ माजवून दिली आहे. त्यांच्या या हटके स्टाईलनंतर द्रमुक नेत्यांनी देखील असेच टि्वट सुरू केले आहेत. पाच वेळा आमदार असलेल्या ई.व्ही. वेलू यांनी थिरूवन्नमलाई मतदारसंघात आपल्या विरोधकाचा प्रचार करण्याचे आव्हान मोदी यांना दिले.
दरम्यान, तमिळनाडूमध्ये सध्या पंतप्रधान मोदींविरोधात नाराजी दिसते. जल्लीकट्टू, नीट, तमिळी अस्मिता, हिंदीचे उद्दातीकरण अशा वादग्रस्त प्रकरणामुळे तमिळी जनतेत केंद्र सरकारबाबत तीव्र नाराजी आहे. तमिळी, द्रविडी परंपरावर भाजप आक्रमण करत असल्याचा आरोप द्रमुक करत आहे.
राज्यातील अण्णाद्रमुक हे केंद्र सरकारच्या हातातील बाहुले असून, त्यांच्या माध्यमातून केंद्र आपली मर्जी चालवत असल्याचे द्रमुक पक्षाचे कार्यकर्ते मतदारांना सांगत आहेत. यातूनच पंतप्रधानांनी आपल्याविरोधात प्रचार केल्यास त्याचा आपल्याला फायदा होईल, असे द्रमुक नेत्यांना वाटते.
