नाशिक – लासलगाव ही आशिया खंडातील सर्वात मोठी कृषी उत्पन्न बाजार समिती असली तरी किसान रेल्वेला लासलगावमध्येच थांबा नसल्याची बाब पुढे आली आहे. याची गंभीर दखल खासदार डॉ. भारती पवार यांनी घेतली आहे. त्यामुळेच त्यांनी तातडीने मध्य रेल्वेला पत्र दिले असून किसान रेल्वेला लासलगाव येथे थांबा देण्याची मागणी त्यांनी केली आहे.
खासदार डॉ. पवार यांनी दिलेल्या पत्रात म्हटले आहे की, लासलगाव ही आशिया खंडातील सर्वात मोठी कृषी उत्पन्न बाजार समिती आहे. तेथे मोठ्या प्रमाणात कांदा, द्राक्षे, डाळिंब, भाजीपाला आदींचा व्यापार देशासह जगभरात केला जातो. केंद्र सरकार मार्फत नुकतीच शेतकऱ्यांच्या शेतीमाल वाहतुकीसाठी किसान रेल्वे सुरू केली आहे. त्याचा थांबा लासलगाव येथे नाही. हा थांबा दिल्यास लासलगावस्थित कृषी उत्पन्न बाजार समिती मधील शेतमाल देशाच्या कानाकोपऱ्यात पोहचविण्यासाठी मदत होईल. दिंडोरी लोकसभा मतदार संघातील तसेच नाशिक जिल्ह्यातील असंख्य शेतकऱ्यांची मागणी लक्षात घेता किसान रेल्वेला लासलगाव येथे थांबा देऊन शेतकऱ्यांना दिलासा द्यावा, अशी विनंती पवार यांनी पत्राद्वारे मध्य रेल्वेचे भुसावळ मंडळ व्यवस्थापक यांच्याकडे केली आहे.
