कामगार नगरला धाडसी घरफोडी, भरदिवसा साडे बारा लाखाच्या तिजोरीवर डल्ला
नाशिक : कामगार नगर भागातील एका डॉक्टरचे घर फोडून चोरट्यांनी तिजोरी पळविली. भरदिवसा झालेल्या धाडसी चोरीत चोरट्यांनी तब्बल साडे बारा लाखाच्या ऐवजावर डल्ला मारला. त्यात ११ लाखाच्या रोकडसह सोन्याचांदीच्या दागिण्यांचा समावेश आहे. याप्रकरणी सातपूर पोलीस ठाण्यात गुन्हा दाखल करण्यात आला आहे.
नरेंद्र बाबुराव पाटील (रा. मधुमैत्री अपा.वनविहार कॉलनी जवळ कामगारनगर) यांनी तक्रार दाखल केली आहे. पोलीसांनी दिलेल्या माहितीनुसार पाटील यांचा वैद्यकीय व्यवसाय असून, बुधवारी (दि.१३) दुपारच्या सुमारास ते रूग्णसेवेसाठी घराबाहेर पडले होते तर त्यांच्या पत्नी आपल्या आजारी आईला भेटण्यासाठी गेल्या असता ही घटना घडली. पाटील दांम्पत्य घरात नसल्याची संधी साधत अज्ञात चोरट्यांनी भरदिवसा त्यांच्या बंद घराचे लॅच लॉक तोडून बेडरूम मधील लाकडी कपाटात बसविलेली तिजोरी पळविली. या तिजोरीत रोकडसह दागिणे असा सुमारे १२ लाख ४८ हजाराचा ऐवज होता. भरदिवसा झालेल्या या धाडसी घरफोडीमुळे परिसरात भितीचे वातावरण पसरले असून चोरट्यांचा बंदोबस्त करावा अशी मागणी होत आहे. अधिक तपास सहाय्यक निरीक्षक नागरे करीत आहेत.
…….
शरणपूररोडला सव्वा लाखाची घरफोडी
नाशिक : शरणपूर रोड भागात झालेल्या घरफोडीत चोरट्यांनी सव्वा लाखाचा ऐवज चोरून नेला. त्यात रोकडसह चांदीच्या धातूने घडलेली भांडी आणि देवदेवतांच्या मुर्तींचा समावेश आहे. याप्रकरणी सरकारवाडा पोलीस ठाण्यात घरफोडीचा गुन्हा दाखल करण्यात आला आहे. चेतन गुलाबचंद राठी (४५ रा.पार्क अव्हेन्यु,साधू वासवाणीरोड) यांनी याप्रकरणी तक्रार दाखल केली आहे. राठी कुटूंबिय १५ नोव्हेंबर ते १२ जानेवारी दरम्यान बाहेरगावी गेले असता ही घटना घडली. अज्ञात चोरट्यांनी त्यांच्या बंद घराचे कुलूप तोडून बेडरूममधील कपाटातून २० हजाराची रोकड व देव घरातील चांदीची भांडी आणि देवदेवतांच्या भरीव मुर्त्या असा सुमारे १ लाख २० हजार रूपये किमतीचा ऐवज चोरून नेला. अधिक तपास उपनिरीक्षक संदिप पवार करीत आहेत.
………..
भररस्त्यात हॉटेल व्यावसायीकास लुटले
नाशिक : वाहनाचा हॉर्न वाजविल्याच्या कारणातून दुकलीने हॉटेल व्यावसायीकास मारहाण करीत लुटल्याची घटना देवळाली गावातील राजवाडा भागात घडली. संशयीतामध्ये एका गुन्हेगाराचा समावेश असून या घटनेत संशयीतांनी हॉटेल मालकाच्या खिशातील रोकड आणि मोबाईल पळविला. याप्रकरणी नाशिकरोड पोलीस ठाण्यात जबरीचोरीचा गुन्हा दाखल करण्यात आला आहे. समिर जमिल शेख व सिध्दांत धनेदर (रा.दोघे राजवाडा,देवळाली गाव) अशी हॉटेल व्यावसायीकास लुटणाºया दुकलीचे नाव आहे. याप्रकरणी बंटी कन्हैय्या दासवाणी (रा.सोमानी गार्डन समोर,एम.जी.रोड ना.रोड) यांनी याप्रकरणी तक्रार दाखल केली आहे. संशयीतांपैकी सिध्दांत धनेदर हा सराईत गुन्हेगार असून त्याच्याविरूध्द नाशिकरोड आणि उपनगर पोलीस ठाण्यात गुन्हे दाखल आहेत. हॉटेल व्यावसायीक दासवाणी बुधवारी (दि.१७) सायंकाळच्या सुमारास आपल्या वाहनातून हॉटेलच्या दिशेने प्रवास करीत असतांना ही घटना घडली. खंडेराव मंदिराजवळ रस्त्यात अचानक उंट आल्याने दासवाणी यांनी आपल्या वाहनाचा हॉर्न वाजविला असता संशयीतांनी त्यांना गाठून हॉर्न वाजविण्याचा जाब विचारला. यावेळी संतप्त दुकली पैकी एकाने जवळ पडलेला दगड उचलून दासवाणी यांच्या डोक्यात हाणला. दासवाणी जखमी झाल्याने संशयीतांनी त्यांच्या खिशातील चार हजार रूपयांची रोकड आणि मोबाईल काढून पोबारा केला. अधिक तपास सहाय्यक निरीक्षक शेळके करीत आहेत.
