लखनौ – उत्तर प्रदेशातील हापूड रोडवर काँग्रेसच्या महासचिव प्रियांका गांधीच्या ताफ्यातील चार गाड्या एकमेकांना धडकल्यामुळे अपघाताची घटना घडली. पुढच्या गाडीचालकाने अचानक ब्रेक लावल्यामुळे हा अपघात झाला. या अपघातात कोणतीही जीवितहानी झालेली नाही व कुणीही जखमी नाही. प्रियांका गांधी रामपूरला प्रजासत्ताक दिनी दिल्लीतील शेतकऱ्यांनी काढलेल्या ट्रॅक्टर रॅलीत मृत्यू झालेल्या नवरीत सिंहच्या परिवाराला भेटण्यासाठी जात होत्या. तेव्हा रस्त्यात हा अपघात झाला. नवरीत सिंग यांचा दहाव्याचा कार्यक्रम आहे. या कार्यक्रमात प्रियांका गांधी सहभागी होणार आहेत. आयटीओजवळ पोलिस बॅरीकेड तोडण्याच्या प्रयत्नात असणारा एक भरधाव वेगाने येणारा ट्रॅक्टर पलटी झाला होता. या ट्रॅक्टरखाली दबून नवरीत सिंग यांचा मृत्यू झाला होता.
