कळवण : पैसा अनेकांना प्यारा असतो.त्यातच जर पैसे सापडले तर नशीब फळफळले किंवा लॉटरी लागल्याचा आनंद पैसे सापडलेल्या व्यक्तीला होतो. मात्र याला अपवाद ठरला कळवण येथील एक लाँड्रीचालक,या लाँड्री चालकाने ग्राहकाचे पैसे परत करत सर्वांचेच मनही जिंकले
कळवण येथील ओतूर रोड परिसरात पाण्याच्या टाकीजवळ गेल्या अनेक वर्षांपासून रमेश बोरसे हे लॉन्ड्रीचा ( इस्त्री ) व्यवसाय करतात . बोरसे यांनी त्यांच्याकडे सतत कपड्यांची इस्त्री करणाऱ्या सेवानिवृत्त प्राचार्य ए.डी.मोरे यांच्या पँटच्या खिशात दहा हजार रुपयांची रोकड सापडल्याने त्यांनी ती प्रामाणिकपणे मोरे यांना परत केली. नजरचुकीने मोरे यांच्याकडून इस्त्री साठी दिलेल्या एका पॅन्टच्या खिशात सदर रक्कम राहून गेली होती . कपडे इस्त्रीला देण्यात आले असले तरी त्यात पैसे आहेत ही बाब मोरे यांच्या लक्षात आली नाही.मात्र , कपडे इस्त्री करायला घेताच रमेश बोरसे यांना पँटच्या खिशात काही तरी असल्याचे निदर्शनास आले. त्यांनी हाती लागलेले दहा हजार मोरे यांना प्रामाणिकपणे परत केले . आजच्या या कलियुगात बोरसे यांनी दहा हजार रुपये परत करून प्रामाणिकपणाचे दर्शन घडविले . यापूर्वीही विसपुते नामक ग्राहकाच्या खिशात असलेले ४ ग्रॅम सोने त्यांनी प्रामाणिकपणे परत केले होते . प्रामाणिक माणसांच्या तुटवड्यात ही घटना अनुभवास येताच प्राचार्य मोरे यांच्यावतीने या बोरसेंचा शाल , श्रीफळ देत सन्मान करण्यात आला . यावेळी रमेश भोसले , उद्धव सोनजे , दिलीप पगार , राजेंद्र जाधव आदी उपस्थित होते .
