कळवण – बांबू विकास मंडळाचे देवगाव येथील सामायिक सुविधा केंद्राचे लोकार्पण

कळवण – महाराष्ट्र राज्य बांबू विकास मंडळाच्या आर्थिक सहाय्याने  उंबरठाण वनपरिक्षेत्रातील देवगाव येथे  उभारलेल्या सामायिक सुविधा केंद्राचे लोकार्पण  करण्यात आले असून बांबूपासून बनविलेल्या विविध शोभिवंत व कलाकुसरीच्या वस्तू बनविण्याकरिता आवश्यक असलेल्या साधन सामुग्री उपलब्ध करून देण्यात आले आहे.

      वन संपत्तीने विपुल असलेल्या सुरगाणा तालुक्यातील देवगाव येथील स्थानिकांना अवगत असलेल्या पारंपारिक  हस्तकलेला आधुनिकतेची जोड प्राप्त व्हावी त्यामुळे उपजत असलेल्या कलेचे जतन होऊन स्थानिकांचा सर्वांगीण विकास होईल , या उद्देशाने नाशिक पूर्व विभागाने महाराष्ट्र राज्य बांबू विकास मंडळाच्या आर्थिक साहाय्याने उंबरठाण वनपरिक्षेत्रातील मौजे देवगाव येथे सामायिक सुविधा केंद्र कार्यान्वित केले असून ९ जानेवारी २०२१ रोजी महाराष्ट्र राज्य बांबू विकास मंडळाचे माजी व्यवस्थापकीय संचालक  टी. एस. के. रेड्डी यांच्या हस्ते लोकार्पण करण्यात आले.

   या कार्यक्रमावेळी प्रमुख पाहुणे  म्हणून विभागीय समन्वयक बी. पी. पवार ,  सुरगाणा उपविभागाचे सहाय्यक वनसंरक्षक  हेमंत शेवाळे, गोंदूने गृप ग्रामपंचायतचे  सरपंच वाडेकर, संयुक्त वनव्यवस्थापन समितीचे अध्यक्ष पवार आदी उपस्थित होते.

‌        या केंद्रात बांबूपासून विविध शोभिवंत व कलाकुसरीच्या वस्तू बनविण्याकरिता आवश्यक असलेल्या साधन सामुग्री जसे की फोर साईड प्लेनर कट  ऑफ मशीन,  डिस्क  सॅनडर,नॉट रिमोव्हर,पॉलिश मशीन इत्यादी उपलब्ध करून देण्यात आले असून स्थानिक कारागिरांना या साधनसमुग्रीच्या साहाय्याने वस्तू बनविण्याकरिता दिनांक १८ जानेवारी पासून तज्ञ प्रशिक्षकांच्या टीम मार्फत प्रशिक्षण देण्यात येणार आहे.

       बांबू विकास मंडळाने उपलब्ध करून देण्यात आलेल्या साधनसामुग्रीचा स्थानिकांनी पुरेपूर व योग्य वापर करून चांगल्या दर्जाच्या शोभिवंत व कलाकुसरीच्या वस्तू तयार करून चांगले आर्थिक उत्पन्न प्राप्त करून गावाच्या सर्वांगीण विकासात मोलाचा वाटा उचलावा अशी अपेक्षा यावेळी महाराष्ट्र राज्य बांबू विकास मंडळाचे माजी व्यवस्थापकीय संचालक  टी. एस. के. रेड्डी यांनी व्यक्त केली. या केंद्राच्या उभारणी करीता सुरगाणा विभागाचे सहाय्यक वनसंरक्षक  हेमंत शेवाळे, उंबरठाणचे वनक्षेत्रपाल  जोपळे यांनी विशेष परिश्रम घेतले असून नाशिक पूर्व विभागाचे उपवनसंरक्षक तुषार चव्हाण, मुख्यवनसंरक्षक गुदगे  महाराष्ट्र राज्य बांबू विकास मंडळ नाशिकचे विभागीय समन्वयक  बी. पी. पवार यांचे मार्गदर्शन लाभले.