५ वर्षाच्या कार्यकाळातील वचनपूर्ती पुस्तिकेचा प्रकाशन सोहळा
कळवण – कळवणकरानी राष्ट्रवादी काँग्रेसच्या हातात नगरपंचायतच्या सत्तेची सूत्रे दिली त्यामुळे गेल्या ५ वर्षात ५० कोटी रुपयांची सार्वजनिक विकासकामे पूर्ण करण्यात यश आले. पुढील काळात देखील अशीच साथ द्या, राज्याचे उपमुख्यमंत्री अजित पवार हे माझे नेते असल्यामुळे कळवण शहराच्या विकासासाठी निधी कमी पडू देणार नाही अशी ग्वाही आमदार नितीन पवार यांनी देऊन पहाटेच्या शपथविधीचा कार्यक्रम व नाट्यमय घडामोडीना उजाळा देत आमदार पवारांनी कळवणकरांना पोटधरुन हसवले.
नगरपंचायतच्या माध्यमातून कळवण शहरातील ५ वर्षाच्या विश्वासाची अन विकासाची लोकाभिमुख कार्याची वचनपूर्ती या विकासकामांचा लेखाजोखा’ असलेल्या पुस्तिकेचे प्रकाशन आमदार नितीन पवार यांच्या हस्ते व नगराध्यक्षा सौं रोहिणी महाले यांच्या अध्यक्षतेखाली झाले. प्रमुख पाहुणे म्हणून कळवण शहरातील व तालुक्यातील महाविकास आघाडीचे पदाधिकारी, नगरसेवक, नगरसेविका, जेष्ठ नागरिक राजकीय पक्ष, सामाजिक, शैक्षणिक, सहकार संस्थांचे पदाधिकारी, वकील, डॉक्टर्स, पत्रकार, प्रगतशील शेतकरी यांना प्रमुख पाहुणे म्हणून निमंत्रित करण्यात आले होते.
आमदार नितीन पवार यांनी सांगितले की गेल्या ५ वर्षात गटनेते कौतिक पगारांनी सार्वजनिक विकासकामांना प्रथम प्राधान्य दिले त्यामुळे शहराचा चेहरामोहरा बदलण्यात यश आले हे सत्य नाकारून चालणार नाही.कळवण शहरातील भविष्यातील पिण्याच्या पाण्याचा प्रश्न सोडविण्यासाठी पाणी पुरवठा योजना, नगरपंचायत प्रशासकीय इमारत, शहरांतर्गत भूमिगत वीज वाहिनी योजना, अग्निशमन वाहन, बगीचा यासह अंतर्गत रस्ते कामे शासनस्तरावर मंजुरीच्या प्रतीक्षेत असून काही कामांना मंजुरी मिळाली असल्याचे आमदार पवार यांनी सांगून कळवण परिसरातील सिंचनासाठी गिरणा नदीवर बंधारे बांधणार असल्याची ग्वाही यावेळी दिली.
यावेळी जिल्हा परिषदेचे माजी उपाध्यक्ष ऍड शशिकांत पवार, कळवण शिक्षण संस्थेचे सरचिटणीस बेबीलाल संचेती, कमको संचालक प्रा निंबा कोठावदे, योगेश मालपुरे, जेष्ठ नेते कारभारी पगार यांनी मनोगत व्यक्त करुन आमदार नितीन पवार व गटनेते कौतिक पगार यांच्या माध्यमातून शहरात झालेल्या विकासकामांच्या कार्याचा गौरव करुन प्रसंशा केली.
यावेळी माजी आमदार काशिनाथ बहिरम, गटनेते कौतिक पगार धनंजय पवार, अशोक पवार, नारायण हिरे, कारभारी आहेर,बाबुलाल पगार,देवराम पगार, ऍड परशुराम पगार, डॉ पोपट पगार, राजेंद्र भामरे, महेंद्र हिरे, अंबादास जाधव, सुनील महाजन, जयेश पगार, अतुल पगार,जितेंद्र पगार,सुनील जैन,दशरथ बच्छाव,मधुकर पगार, के के शिंदे,मुरलीधर पगार, गजानन सोनजे, संजय मालपुरे,रंगनाथ देवघरे, विश्वनाथ व्यवहारे, मधुकर बोरसे, चंद्रकांत उपासणी, शेख मुस्ताक,देविदास विसपुते,साहेबराव पगार, बाजीराव पगार, हनीफ शेख आदींसह मान्यवर उपस्थित होते, सूत्रसंचालन व प्रास्तविक राकेश हिरे तर आभार राजेंद्र भामरे यांनी मानले.
आमदार पवार भावनाविवश
कळवण नगरपंचायतच्या माध्यमातून विकासकामांच्या निमित्ताने स्व. ए. टी. पवारांची आठवण झाल्याचे सांगून भावनाविवश झाले. त्यांच्या बरोबर काम करणारी जेष्ठ मंडळी व्यासपीठावर उपस्थित असल्यामुळे त्यांचे मार्गदर्शन मला नेहमीच लाभते, स्व. पवार सारखे काम करणे मला जमत नाही मात्र त्यांच्या सारखे काम करण्याचा माझा प्रयत्न चालू आहे, त्यांच्या प्रतिमेला धक्का बसेल असे कुठलेही काम माझ्या हातून होणार नाही असेही त्यांनी यावेळी सांगितले.
