कळवण – बाजार समित्यांमध्ये लाल आणि उन्हाळ कांद्याची आवक वाढत असल्याने कांद्याच्या भावात घसरण होत आहे. उन्हाळ कांदा सरासरी १७५० तर लाल कांदा रुपये प्रति क्विंटलप्रमाणे विक्री होत आहे . केंद्र सरकारने निर्यात खुली केली नाही तर दरातील ही घसरण सुरुच रहाणार आहे . त्यामुळे दर स्थिर ठेवण्यासाठी कांदा निर्यात खुली करण्याची मागणी कळवण तालुका शेतकरी संघटना व कांदा उत्पादक संघटना यांनी केली असून याबाबत नायब तहसीलदार डॉ व्यंकटेश तृप्ते यांना निवेदन दिले आहे.
राज्य कांदा उत्पादक संघटनेचे तालुकाध्यक्ष विलास रौंदळ, शेतकरी संघटना तालुकाध्यक्ष बाळासाहेब शेवाळे, शिवसेना तालुकाप्रमुख अंबादास जाधव यांच्या नेतृत्वाखालील शिष्टमंडळाने नायब तहसीलदार डॉ तृप्ते यांची भेट घेऊन निवेदन दिले.
१४ सप्टेंबर २०२० रोजी केंद्र शासनाने अचानकपणे कांदा निर्यात बंदी ही जाहीर करुन शेतकऱ्यांच्या मुळावरच घाव घालण्याचे काम केंद्र शासनाने केले आहे. ही कांदा निर्यात बंदी शेतकरी हिताच्या दृष्टीने घातक आहे.तसेच कांद्याचे आगार समजल्या जाणाऱ्या नाशिक जिल्ह्यातच कांदा आज रोजी मोठ्या प्रमाणात उपलब्ध आहे.तसेच छोट्या मोठ्या शेतकरी वर्गाकडे थोड्या प्रमाणात कांदा उपलब्ध आहे. वातावरण बदलामुळे कांदा चाळीतच मोठ्या प्रमाणात सडुन नुकसान झाले आहे. त्यातच कोरोनाच्या महामारीमुळे शेतकरी अस्मानी अशा सुल्तानी संकटात सापडला असतांना त्यातच ही कांदा निर्यात बंदी केल्याने शेतकरी वर्गात तीव्र अशा संतप्त प्रतिक्रिया उमटत आहेत. हा सर्व कांदा निर्यात बंदीचा निर्णय शेतकरी हिताच्या दृष्टीने पुर्णत : चुकीचा घेतला गेला असुन कांद्यावरिल निर्यात बंदी ही केंद्र शासनाने लवकरात लवकर उठवावी व कांदा निर्यात खुली करण्याची मागणी निवेदनाद्वारे केली आहे.
केंद्र सरकारने कांदा निर्यात बंदी करुन परदेशी कांद्याची आयात करून कांद्यावर एकापाठोपाठ एक निर्बध घातले त्यामुळे कांद्याचे बाजार भाव घसरून कांदा उत्पादकांना मोठ्या आर्थिक नुकसानीला सामोरे जावे लागत असून आता कांद्याचे दर प्रति क्विंटलला सरासरी २ हजार रुपयापेक्षाही कमी झाल्याने केंद्र सरकारने परदेशी कांदा आयात करणे १०० टक्के बंद करून कांद्यावरील निर्यातबंदी तात्काळ उठवावी आणि राज्यातील कांदा उत्पादकांचे होणारे आर्थिक नुकसान टाळावे अन्यथा महाराष्ट्र राज्य कांदा उत्पादक शेतकरी संघटनेकडून राज्यभर रेल रोको , रास्ता रोको आंदोलन केले जाईल याची शासनाने नोंद घ्यावी असा इशारा राज्य कांदा उत्पादक संघटनेचे तालुकाध्यक्ष विलास रौंदळ यांनी निवेदनाद्वारे दिला आहे.
यावेळी कांदा उत्पादक संघटनेचे जिल्हा कार्याध्यक्ष ओंकार पाटील, शिवसेना तालुकाप्रमुख अंबादास जाधव, विनोद खैरनार, योगेश पगार, प्रल्हाद गुंजाळ, युवराज वाघ, राजेश शिरसाठ, विजय पाटील, रामा पाटील, दादाजी जाधव, किशोर पवार, तुषार पाटील, मुन्ना आहेर, अमित पवार, शरद आहेर, पवन रौंदळ, संजय रौंदळ, रामदास आहेर, योगेश पाटील, दिलीप शेवाळे, रमेश बच्छाव, दादा जाधव आदी उपस्थित होते.
शेती व्यवसाय अडचणीत सापडण्याची भिती
सध्या भाजीपाल्याला दर मिळत नसून इतर नगदी पिकांचीही अशी स्थिती राहिली तर शेती व्यवसाय हा अडचणीत सापडण्याची भिती शेतकऱ्यांना भेडसावत आहे .राज्यात सध्या लाल कांद्याचे उत्पादन होत असून त्याची आवक वाढली आहे . दर वाढीच्या अपेक्षेने अनेक शेतकऱ्यांनी उन्हाळ कांद्याची साठवणूक करुन ठेवली होती. परंतु , त्याची साठवण क्षमता संपत आली असून तो खराब होण्यास सुरुवात झाल्याने अनेकांनी तो विक्रीला आणण्यास सुरुवात केली आहे . मागणीच्या तुलनेत पुरवठा मोठ्या प्रमाणात होत आहे. राजस्थान आणि मध्यप्रदेशमध्येही नवीन कांदा बाजारात दाखल होत असल्याने दरात घसरण होत आहे .
