मुंबई – ‘मी टू’ मोहिमेअंतर्गत थेट नाना पाटेकर यांच्यावर लैंगिक शोषणाचे आरोप करणारी अभिनेत्री तनुश्री दत्ता लवकरच बॉलिवूडमध्ये कमबॅक करण्याच्या विचारात आहे. यासाठी तिने तब्बल १५ किलो वजन कमी केले आहे. सध्या तिच्याकडे साउथचे अनेक चित्रपट आहेत. यासोबतच बॉलिवूडमधील माझे अनेक शुभचिंतकही मला काम देणार असल्याचे तिचे म्हणणे आहे.
सध्या ती अमेरिकेत आयटी क्षेत्रात काम करत असल्याच्या अनेक चर्चा सुरु होत्या. मात्र, असे काही नसल्याचे तिने स्पष्ट केले. मी आयटी मध्ये शिक्षण घेतले आहे, आणि नोकरीची ही संधी म्हणजे एक गौरव होता, पण मला अभिनयातच करियर करायचे असल्याने मी ही संधी स्वीकारली नाही. याशिवाय या नोकरीसाठी ३ वर्षांचा बॉण्ड असतो, तो पूर्ण केल्याशिवाय परत येणे शक्य नसते.
मी हाडाची कलाकार असून अभिनयापासून लांब राहणं मला शक्य नाही. म्हणूनच मी परत येण्याचा निर्णय घेतला. काही चुकीच्या लोकांमुले मी या क्षेत्रांपासून दुरावले होते. सध्या चित्रपटांसोबतच मला वेबसिरीजच्या देखील ऑफर येत असल्याचे तिने सांगितले.
