मुंबई – अभिनेत्री कंगना रानौत हिच्या बंगल्याच्या आवारातील अनधिकृत बांधकाम तोडायला मुंबई उच्च न्यायालयाने उद्यापर्यंत (१० सप्टेंबर) स्थगिती दिली आहे. कंगनाच्या मुंबईतल्या बंगल्याच्या आवारातलं बांधकाम तोडण्याच्या मुंबई महानगरपालिकेनं काल दिलेल्या नोटिशीनुसार आज कारवाई सुरु झाली. ती थांबवण्यासाठी कंगनानं आज मुंबई उच्च न्यायालयात याचिका दाखल केली होती. या प्रकरणी मुंबई महानगरपालिकेनं उद्यापर्यंत स्पष्टीकरण द्यावं, असे निर्देश न्यायालयानं आज (९ सप्टेंबर) दिले.
दरम्यान, कंगनाच्या बंगल्यावर कारवाईसंदर्भात राज्याचे गृहमंत्री अनिल देशमुख यांना आजही धमकीचे दूरध्वनी आल्याचे, पीटीआयच्या वृत्तात म्हटले आहे. यापैकी एक दूरध्वनी हिमाचल प्रदेशातून आल्याचे, तर अन्य दोन दूरध्वनी इतर ठिकाणाहून आल्याचं या बातमीत म्हटले आहे.
