– तिसऱ्या अपत्यामुळे इगतपुरीच्या प्रांताधिकाऱ्यांचा आदेश
– अदा केलेले मानधन वसुली करण्याचेही फर्मान
इगतपुरी : तिसऱ्या अपत्याचा जन्मदाखला उपलब्ध नसतांना अंगणवाडी सेविकेकडील माहितीच्या आधारे महिला पोलीस पाटील संगीता केशव केवारे यांना अपात्र घोषित करण्यात आले आहे. इगतपुरी तालुक्यातील मायदरा धानोशी येथील ही घटना असून नाशिक जिल्ह्यात पोलीस पाटलाला अपात्र करण्याची ही पहिलीच घटना आहे. इगतपुरी त्र्यंबकेश्वरचे उपविभागीय अधिकारी तेजस चव्हाण यांच्याकडे पोपट पांडुरंग केकरे यांनी सबळ पुराव्यांसह तक्रार दाखल केली होती. याबाबत दोन्ही पक्षकारांना वाजवी संधी देऊन न्यायिक कामकाज पार पाडण्यात आले. संगीता केवारे यांच्याकडील पोलीस पाटील पदाचा कार्यभार अपात्रतेमुळे काढण्यात आला असून एप्रिल २०१८ पासून त्यांना दिलेल्या एकूण मानधनाची तातडीने वसुली शासनजमा करण्यात येणार असल्याचे आदेशात नमूद आहे.
