आरोग्य विज्ञान विद्यापीठाच्या प्रभारी कुलगुरुपदी डॉ. नितीन करमळकर

नाशिक – महाराष्ट्र आरोग्य विज्ञान विद्यापीठाचे प्रभारी कुलगुरु पदाचा कार्यभार सवित्रीबाई फुले पुणे विद्यापीठाचे मा. कुलगुरु डॉ. नितीन करमळकर यांनी ११ फेब्रुवारी रोजी स्विकारला आहे. मा. कुलपती कार्यालयाने आदेशित केल्यानुसार आरोग्य विद्यापीठाच्या प्रभारी कुलगुरु पदाचा कार्यभार डॉ. दिलीप म्हैसेकर यांनी विद्यापीठाचा मानदंड देऊन डॉ.नितीन करमळकर यांच्याकडे सुपूर्द केला आहे.

याप्रसंगी विद्यापीठाचे प्रभारी कुलगुरु डॉ. नितीन करमळकर यांनी सांगितले की, आरोग्य विद्यापीठाच्या कुलगुरु पदाचा कार्यभार स्विकारतांना मला आनंद होत आहे. विद्यापीठाचे कार्यक्षेत्र संपूर्ण महाराष्ट्र राज्यात असून आरोग्य क्षेत्राशी निगडीत लोकांबरोबर मला काम करण्याची संधी मिळाली आहे. कोविड-19 च्या काळात विद्यापीठाने व विविध आरोग्य संस्थांनी केलेले कार्य उल्लेखनीय आहे. शैक्षणिक व प्रशासकीय कामकाजाबरोबर विद्यार्थीकेंद्री उपक्रम व संशोधनाचे कामकाज विद्यापीठातून यापुढे घडावे यासाठी मी प्रयत्नशील राहील असे त्यांनी सांगितले.

विद्यापीठाचे कुलसचिव डॉ. कालिदास चव्हाण यांनी सांगितले की, विद्यापीठाचे प्रभारी मा. कुलगुरु डॉ. नितीन करमळकर यांचे विद्यापीठ परिवाराच्या वतीने स्वागत करतो. मा. कुलगुरु डॉ. दिलीप म्हैसेकर व मा. प्रति-कुलगुरु डॉ. मोहन खामगांवकर यांनी विद्यापीठाच्या शैक्षणिक व प्रशासकीय कामकाजात अनेक महत्वपूर्ण निर्णय घेतले तसेच सर्वांना मोलाचे मार्गदर्शन केले आहे. यापुढे प्रशासकीय कामकाजात आपणही मार्गदर्शन करावे जेणेकरुन विद्यापीठाची यशस्वीतेकडे जोमाने वाटचाल होईल असे त्यांनी सांगितले.

विद्यापीठाचे प्रभारी कुलगुरू डॉ. नितीन करमळकर सध्या सावित्रीबाई फुले पुणे विद्यापीठाचे मा. कुलगुरु आहेत. त्यांनी कोल्हापूरच्या शिवाजी विद्यापीठातून भूगर्भशास्त्रात बीएस्सी केल्यानंतर त्यांनी एमएस्सीसाठी पुणे विद्यापीठात प्रवेश घेतला. पुढे ‘पेट्रोग्राफी जिओकेमेस्ट्री ऑफ अल्ट्रामफाइट्स फ्रॉम पार्टस ऑफ लडाख हिमालाय (विथ रेफ्रन्स टू क्रोमॅटिक मिनरलायझेशन)’ या विषयात पीएचडी प्राप्त केली. याच विषयाशी निगडीत बाबींवर त्यांनी ऑस्ट्रेलियातील सिडनीत तसेच जर्मनीत संशोधन केले.

डॉ. करमळकर यांना उच्च शिक्षण क्षेत्रातील अध्यापन, प्रशासन, तसेच संशोधनाचा मोठा अनुभव आहे. पर्यावरण, भूगर्भशास्त्र, भूरसायनशास्त्र हे त्याचे संशोधनाचे विषय. राष्ट्रीय तसेच आंतरराष्ट्रीय स्तरावरील नियतकालिकांमधून त्यांचे शोधनिबंध प्रसिद्ध झाले आहेत. तसेच, परदेशातील काही संस्थांबरोबर सध्या संशोधन प्रकल्प सुरू आहेत. पाषाण हा त्यांचा अभ्यासाचा विषय असून, विविध प्रकारच्या अधिवासात आढळणाऱ्या पाषाणांवर त्यांचे संशोधन सुरू आहे. त्यांच्या कामाचा विविध संस्थांकडून आजवर गौरव करण्यात आला. त्यांचे विद्यार्थी आज वेगवेगळया देशांना मोठ्या पदांवर आहेत. त्याचे शिक्षण क्षेत्रातील अतुलनीय कार्य असून ते आरोग्य विद्यापीठाच्या वाटचालीत त्यांची भूमीका महत्वाची असणार आहे.

विद्यापीठाचे मा. कुलगुरु डॉ. दिलीप म्हैसेकर व प्रति-कुलगुरु डॉ. मोहन खामगांवकर यांच्या पदाचा कार्यकाळ आज रोजी संपुष्टात आला आहे. विद्यापीठाच्या प्रभारी कुलगुरु पदाचा कार्यभार स्विकारल्यानंतर कुलसचिव डॉ. कालिदास चव्हाण यांनी विद्यापीठाचे प्रशासकीय कामकाज व कार्यप्रणालीबद्दल सादरीकरणाव्दारे मा. प्रभारी कुलगुरु डॉ. नितीन करमळकर यांनी थोडक्यात माहिती दिली.

याप्रसंगी व्यासपीठावर विद्यापीठाचे मा. परीक्षा नियंत्रक डॉ. अजित पाठक, वित्त व लेखाधिकारी श्री. एन.व्ही. कळसकर, डॉ. श्रीकांत देशमुख, डॉ. धनाजी बागल, डॉ. राजश्री नाईक आदी मान्यवर उपस्थित होते. अधिसभागृहात मा. प्रभारी कुलगुरु यांच्या अध्यक्षेतेखाली बैठकीत विद्यापीठातील सर्व विभागप्रमुख व अधिकारी उपस्थित होते.