मनमाड – येथून ५ कि.मी. अंतरावरील अस्तगावचे रहिवासी असलेले जवान सुरेश रघुनाथ घुगे यांना जम्मू-काश्मीर येथे देशसेवा करीत असतांना वीरमरण आले आहे. याबाबतची माहिती लष्कराकडून घुगे कुटुंबियांना पहाटे दूरध्वनीवरुन कळविण्यात आली. जम्मू येथे शुक्रवारी रात्री नऊ वाजता डोंगरावर गस्त घालतांना जवान सुरेश घुगे यांचा पाय घसरला. त्यात ते कोसळले. या घटनेत त्यांच्या डोक्याला जबर मार लागला. मेंदूला दुखापत झाली. लष्करी इस्पितळात शर्थीचे वैद्यकीय उपचार झाले. दुर्दैवाने यात त्यांना वीरमरण आले. खराब हवामानामुळे विमानाने त्यांचे पार्थिव आणतांना अडचणी निर्माण झाल्या आहेत. त्याबाबत अधिकृतपणे निर्णय तेथील लष्करी अधिकारी घेणार आहेत. त्यांच्या मृत्यूची वार्ता कळाल्यानंतर नातेवाईक व ग्रामस्थांनी अस्तगावच्या निवासस्थानी गर्दी केली आहे. त्यांच्या पश्चात आई-वडील, पत्नी, मुलगी, एक भाऊ आणि दोन बहिणी असा परिवार आहे.
