अशी आहे देशातील पहिली ट्री अॅम्ब्युलन्स; घरपोच विनामूल्य सेवा

अमृतसर (पंजाब) – मनुष्य आणि प्राणी यांच्या रुग्णवाहिका आणि रुग्णालये आपण पाहिल्या असतील. परंतु पंजाबमधील अमृतसर जिल्ह्यात एक अनोखे रुग्णालय तथा रूग्णवाहिका सुरू झाली असून नागरिकांनी त्याचे स्वागत केले आहे. आपण आता एक अनन्य साधारण रुग्णालय आणि रुग्णवाहिका (ट्री अॅम्ब्युलन्स ) संबंधी जाणून घेऊ या…

    सदर रुग्णालय पर्यावरण संरक्षणास प्रेरित करत असून अमृतसरमधील हे रुग्णालय झाडे आणि वनस्पतींवर उपचार करत आहे. भारतीय महसूल अधिकारी (आयआरएस) रोहित मेहरा यांनी देशातील ही पहिली वृक्ष रुग्णवाहिका सुरू केली आहे.

विशेष गोष्ट अशी की, त्यामध्ये सुमारे ३२ प्रकारच्या आजारांवर उपचार केले जातील. मेहरा म्हणतात की, जेव्हा झाडे आजारी पडतात तेव्हा ती उपटून टाकू नका, कारण ते बरे होऊ शकतात.  आयुर्वेदाच्या आधारे झाडांवर उपचार केले जातील.

     रोहित मेहरा यांच्या म्हणण्यानुसार, वृक्षांचे पुनरुज्जीवन करण्यासाठी वृक्ष रुग्णवाहिकेत तज्ज्ञांची एक टीम तयार करण्यात आली आहे, ते झाडांच्या आजारावर उपचार करण्यास तयार आहे.  वृक्ष रुग्णवाहिकेत आठ वनस्पतिशास्त्रज्ञ आणि पाच शास्त्रज्ञ असून वेगवेगळ्या आजारांवर उपचार करण्याची एक प्रणाली आहे.

ज्या नागरिकांना आपल्या घरात किंवा उद्यानात मोठी झाडे लावली आहेत, त्यांना वृक्षांची काळजी घेण्यासाठी पुढे यावे लागेल. ज्या व्यक्तीस वृक्षांच्या उपचारासाठी ट्री अ‍ॅम्ब्युलन्सची मदत हवी असेल अशांना मोबाईल क्रमांक 8968339411 वर त्याची माहिती द्यावी लागेल. यानंतर तज्ज्ञांची टीम घटनास्थळी जाईल आणि तपासणीनंतर उपचार सुरू होतील.

हे सर्व काम विनामूल्य केले जाईल. रोहित मेहरा पुढे म्हणाले की, वृक्ष रुग्णवाहिकेला ‘पुष्पा ट्री अँड प्लांट हॉस्पिटल अँड दवाखाना’ असे नाव देण्यात आले आहे. ही रुग्णवाहिका शहरातील प्रवास करेल. या पथकाला साध्या उपचारापासून ते रोपाच्या प्रत्यारोपणापर्यंत काम करण्याचा अनुभव आहे.