पिंपळगाव बसवंत, ता. निफाड – येथील टोल नाका ते पिंपळगाव बसवंत सर्व्हिस रोडवरील हाॅटेल भोले पंजाबजवळ अनोळखी व्यक्तीचा मृतदेह आढळून आला आहे.
याबाबत माहिती अशी की, टोल नाका ते पिंपळगाव बसवंत सर्व्हिस रोडवरील हाॅटेल भोले पंजाबजवळ अनोळखी व्यक्तीचा मृतदेह असल्याची माहिती उंबरखेड येथील शेतकरी मुकूंद बाजीराव घुमरे (वय ५०) यांनी पिंपळगाव पोलिसांना दिली. त्यानंतर पोलीस उपनिरिक्षक सुरेश चौधरी यांच्या मार्गदर्शनाखाली पोलीस नाईक रामदास गांगुर्डे यांनी घटनास्थळी येऊन पंचनामा केला. वय अंदाजे ५० ते ५५ असून, शरीराने सडपातळ, उंची पाच फूट, दोन इंच रंग काळा-सावळा, चेहरा गोल, नाक सरळ, केस बारीक काळे, अंगात लाल रंगाचा फूल बाहिचा शर्ट, कमरेला चौकटी सफेद निळसर रंगाची लुंगी, बगलेत हिरव्या रंगाची झोळी, पायात प्लास्टिक चप्पल अशा वर्णनाची सदर व्यक्ती आहे. याप्रकरणी पिंपळगाव पोलीस ठाण्यात अकस्मात मृत्यूची नोंद करण्यात आली आहे. सदर व्यक्तीची ओळख पटल्यास पिंपळगाव बसवंत पोलीस ठाण्यात संपर्क साधावा, असे आवाहन पोलीस उपनिरिक्षक सुरेश चौधरी, पोलीस नाईक रामदास गांगुर्डे यांनी केले आहे.
