अनलॉक नंतर “पुन्हा सही रे सही” ला जोरदार प्रतिसाद, भरत जाधवने केले कौतुक

नाशिक – अनलॉक नंतर “पुन्हा सही रे सही” चा जोरदार प्रतिसादात पुनःश्च हरी ओम झाला आहे. पुणे, पिंपरी चिंचवड, मुंबई पाठोपाठ नाशिक येथील सहीच्या प्रयोगानेही हाऊसफुलचा मान मिळविला. ९ महिन्याच्या प्रदीर्घ lockdown नंतर होत असलेल्या सहीच्या प्रयोगाला नाशिककरांनी अभूतपूर्व प्रतिसाद दिला. ऑनलाइन बुकिंग बरोबर कालिदास येथील आगाऊ तिकिट विक्रीला प्रेक्षकांनी तूफान गर्दी करत चक्क एकाच दिवसात हाऊसफुल केल्याचे प्रसिध्द अभिनेते भरत जाधव यांनी सांगितले. त्यांनी याबद्दल आयोजक जयप्रकाश जातेगावकर यांचा सत्कार केला.

या प्रयोगाला तिकिट न मिळालेल्या रसिकांच्या विनंतीस मान देऊन खास डिमांड शो रविवार २१ फेब्रुवारी सायंकाळ ६ वाजता आयोजित करण्यात आल्याचे यावेळी आयोजकांनी सांगितले. जिवंत करमणुकीसाठी आसुसलेल्या रसिक प्रेक्षकांनी पुणे, मुंबई, नाशिक येथील रंगमंदिरातील प्रयोग अक्षरशः डोक्यावर घेतले. अस वाटलंच नाही की उपस्थिती फक्त ५०% (शासन आदेशानुसार) आहे. खरच ५०% रसिकांचा १०१% “हाऊसफुल्ल” प्रतिसाद मिळाला असे भरत जाधव याने सांगितले. या प्रयोगाचे सादरीकरण शासन आदेशानुसार सर्व ती खबरदारी घेऊनच संपन्न झाला.