अक्षरबंध दिवाळी अंकाचे प्रकाशन उत्साहात

नाशिक – गेल्या १२ वर्षांपासून साहित्यक्षेत्रात आपला वेगळा ठसा उमटवलेल्या अक्षरबंध मासिकाच्या  ‘अक्षरबंध दिवाळी २०२० विशेषांकाचे प्रकाशन उत्साहात पार पडले. ज्येष्ठ पत्रकार किरण लोखंडे यांच्या हस्ते आणि अभिनेते, ‘मायबाप’कार राजेंद्र उगले यांच्या अध्यक्षतेखाली प्रकाशन सोहळ्याचे आयोजन करण्यात आले होते. अक्षरबंधच्या कार्यालयात पार पडलेल्या कार्यक्रमाची सुरुवात ग्रंथपूजनाने झाली. यावेळी जिल्हा परिषद सदस्य यतिन कदम, जऊळके दिंडोरीचे युवा नेते तुकाराम जोंधळे, ज्येष्ठ साहित्यिक किरण दशमुखे, कवी, गीतकार आणि चित्रकार विष्णू थोरे, लेखक, पत्रकार प्रशांत भरवीरकर प्रमुख पाहुणे म्हणून उपस्थित होते.

साहित्य आणि राजकारण एकाच नाण्याच्या दोन बाजू आहेत. त्या वेगळ्या होऊ शकत नाहीत आणि त्या कोणी वेगळ्या करूही नये. त्यामुळे अक्षर चळवळ पुढे नेण्यासाठी लोकप्रतिनिधींनी पालखीचे भोई व्हावे. अक्षरबंधच्या या चळवळीला राजकीय पाठबळ मिळाल्यास ही चळवळ वर्धिष्णू होण्यास मदत होईल, अशी भावना किरण लोखंडे यांनी व्यक्त केली.
अध्यक्षस्थानावरून बोलताना राजेंद्र उगले म्हणाले, आशेचा किरण आणि अक्षरांसह उगवणं या ठिकाणी जमून आलं आहे. अक्षर चळवळ पुढे नेण्यासाठी ती समाज आणि गावाशी जोडावी लागते आणि ते काम अक्षरबंध करीत आहे. ही चळवळ गावागावांतील शाळांपासून सुरू व्हावी. अशीही अपेक्षा त्यांनी यावेळी व्यक्त केली.

कोरोना काळातही अंकाची इम्यूनिटी उत्तम राखण्याचे काम अक्षरबंध टीमने केल्याची भावना ज्येष्ठ साहित्यिक किरण दशमुखे यांनी व्यक्त केली. धडपड असली की निर्मिती होते आणि ती धडपड अर्थपूर्ण मुखपृष्ठातून अक्षरबंधने साकारलेली आहे. साहित्य चळवळीतील हा प्रवाह अधिक जोमाने वाढावा ही सदिच्छा विष्णू थोरे यांनी व्यक्त केली.
जिल्हा परिषद सदस्य यतिन कदम म्हणाले की,  प्रत्येकाचे आयुष्य संघर्षातूनच उभे राहते. त्यातही तरुन जाण्याचे बळ पुस्तके देतात. देवाप्रमाणे पुस्तकांची आठवण आपल्याला दुःखात होते आणि ती दिशादर्शक ठरते. अक्षरबंधच्या साहित्य चळवळीला आम्ही सदैव पाठबळ देऊ, अशी ग्वाही त्यांनी यावेळी दिली. युवा नेते तुकाराम जोंधळे यांनी त्यांच्या जडणघडणीत अक्षरबंधचा महत्त्वाचा वाटा असल्याचे नमूद करून गावाची सांस्कृतिक ओळख निर्माण व्हावी यासाठी ग्रामपंचायत या चळवळीत नेहमीच योगदान देईल. तसेच येत्या काळात गावात सुसज्ज वाचनालय उभारण्याची मनोकामना व्यक्त केली. जऊळके दिंडोरीचे उपसरपंच मधुकर केदारे यांनी मनोगतातून वाचनाचे महत्त्व विषद केले.
यावेळी लेखिका सीमा महाबळ, अभिनेत अरुण इंगळे, दीपक शहाणे, दत्तात्रेय बैरागी, प्रा. मेघना वाघ, प्रा. प्रियंका कुंदे, कवी प्रशांत धिवंदे, चित्रकार भा.वा.जाधव, प्रीती तिडके, गणेश तिडके, कांचन रहाणे, पत्रकार संदीप गुंजाळ, समाधान पाटील, सुनील भुमरे, बाळकृष्ण काकड, स्नेहल गाडगे, अनिल आहेर, अशोक जोंधळे, सोमनाथ बोरस्ते, भाऊसाहेब जोंधळे, विश्‍वनाथ जोंधळे, सोमनाथ चौधरी आदींची उपस्थिती होती.

कार्यक्रमाचे स्वागत कवयित्री कोमल जगझाप हिने काव्यमय पद्धतीने केले, तर प्रास्ताविकातून कार्यकारी संपादक सप्तर्षी माळी यांनी अक्षरबंध चळवळीचा प्रवास विषद केला . प्रसिद्ध कवी प्रा. डॉ. गणेश मोगल यांनी सूत्रसंचालन केले. संपादक प्रवीण जोंधळे यांनी आभार मानले. कार्यक्रम यशस्वितेसाठी अक्षरबंधच्या समन्वयक कल्याणी देशपांडे- बागडे, सुनीता बर्वे, साई बागडे, प्रीती जोंधळे, चारुशीला माळी, दीपाली मोगल, अक्षय बर्वे, बाळा विधाते, यतीश भानू, किशोरी बावके, गायत्री बर्वे, वैष्णवी माळी, सुशांत देवरे, अथर्व जोंधळे, अनुष्का माळी आदींनी परिश्रम घेतले.

ग्रंथ व रोपे भेट
अक्षरबंधने नेहमीप्रमाणे वेगळेपण जपताना मुखपृष्ठावर साकारलेल्या छायाचित्राची प्रतिकृती तयार करत आणि पारंपरिक दीपप्रज्वलनाऐवजी पणत्या प्रज्वलीत केल्या. कोरोनाच्या या काळात नैराश्‍याचे मळभ दूर होऊन आनंदाचा सुगंध आयुष्यात दरवळावा म्हणून फुलांनी सजलेल्या टोपलीतून दिवाळी अंक काढून मान्यवरांनी आगळ्यावेगळ्या पद्धतीने प्रकाशन केले. मान्यवरांचा सत्कार करताना पारिजातकाची रोपे आणि ग्रंथ भेट देण्यात आले.

चांगल्या पुस्तकांना पुरस्कार
अक्षरबंध चळवळीच्या माध्यमातून साहित्यविश्‍वात येणाऱ्या चांगल्या पुस्तकांना पुरस्कार सुरू करावेत म्हणून तळेगाव (ता. दिंडोरी) येथील सेवानिवृत्त अधीक्षक डी. के. चौधरी यांनी २५ हजारांचा, तर पतीच्या स्मरणार्थ मुंबई येथील प्राथमिक शिक्षिका सरोजिनी देवरे यांनी २० हजार रुपयांचा धनादेश यावेळी आयोजकांकडे सुपूर्द केला.