दिंडोरी – सुरगाणा तालुक्यातील भिवतास धबधब्याने सध्या पर्यटकांचे आकर्षण बनला आहे. नाशिक जिल्ह्यासह गुजरातमधील पर्यटक सध्या तेथे येत असून यानिमित्ताने निसर्गाचा अनोखा नजारा त्यांना पहावयास मिळत आहे. तसेच, कोरोनाच्या संकटात या धबधब्याने अनेकांमध्ये चैतन्य निर्माण होत आहे.
दाट वनराई हिरवाईने नटलेली त्यात कोसळणारा पाऊस, गार वारा, धुक्याची चादर असे नयनरम्य दृश्य सद्या दिंडोरी तालुक्याचा पश्चिम भाग व पेठ-सुरगाणा तालुक्यातील दऱ्या डोंगर पर्यटकांना आकर्षित करत आहेत. सुरगाणा तालुक्यातील भिवतास धबधबा पर्यटकांना भुरळ घालत आहे. शनिवारी आलेला स्वातंत्रदिन आणि रविवारची सुटी यामुळे दोन्हीं दिवशी शेकडो पर्यटकांनी भिवतास येथे भेट देत पावसाळी पर्यटनाचा आनंद लुटला.
दिंडोरी तालुक्यातील गोळशी, ननाशी, भनवड, मांजरपडा, देवसाने परिसरात घाटमाथ्यावर सध्या धुक्याची चादर पसरली आहे. ननाशी पासून पश्चिमेला ३० किलोमीटरवर बाऱ्हे जवळ केळवण येथे नार नदीवर भिवतास हा धबधबा आहे. नाशिक जिल्ह्यासह गुजरात मधूनही मोठ्या प्रमाणात पर्यटक भेट देत आहेत. परिसरातील विविध नदी, नाले, घाट, रस्ते, छोटे, छोटे धबधबे पर्यटकांना आकर्षित करीत आहेत. फोटो व व्हिडिओ काढत पर्यटक मनमुराद आनंद लुटत आहेत. मात्र, धबधब्याजवळ सुरक्षा कठडे नाही. त्यामुळे बाऱ्हे पोलिसांनी येथे बंदोबस्त ठेवत पर्यटकांना असुरक्षित जाण्यास मज्जाव केला.
