महसूल दिन समारंभ ऑनलाईन संपन्न
नाशिक – महसूल विभाग हा शासन व प्रशासनाचा कणा आहे. या महसूल वर्षात ‘आठ अ’ हा ऑनलाईन उतारा देण्याची सुविधा देखील सुरू करण्यात आली असल्याचे महसूल मंत्री बाळासाहेब थोरात यांनी सांगितले. ऑनलाईन महसूल दिन कार्यक्रमात थोरात यांच्यासह अन्न, नागरी पुरवठा व ग्राहक संरक्षण मंत्री छगन भुजबळ, कृषिमंत्री दादाजी भुसे यांनी कौतुकाची थाप दिली. यासोबत नाशिक विभागातील महसूल विभागातील अधिकारी कर्मचारी यांनी केलेल्या उत्कृष्ट कामाबद्दल त्यांचा सत्कार करून महसूल दिनाच्या शुभेच्छा दिल्या.
कोरोनाची परिस्थिती लक्षात घेता नाशिक विभागात तंत्रज्ञानाच्या मदतीने ऑनलाईन महसूल दिन साजरा करण्यात आला. या कार्यक्रमांतर्गत नाशिक विभागातील सर्व जिल्हे व तालुक्यातील कोतवालांपासून ते अपर जिल्हाधिकारी असे सर्व साधारण अडीच ते तीन हजार महसूल अधिकारी कर्मचारी उपस्थित होते. महाराजस्व अभियानाचे औपचारिक उद्घाटन देखील यावेळी करण्यात आले. तसेच गेल्या महसूल वर्षात प्रत्येक जिल्ह्यात प्रातिनिधीक स्वरूपात उत्कृष्ट काम केलेल्या अधिकारी कर्मचारी यांचा सत्कार यावेळी करण्यात आला. उपायुक्त दिलीप स्वामी यांनी या कार्यक्रमाच्या निमीत्ताने प्रत्यक्ष व व्हिडीओ कॉन्फरन्सिंगद्वारे ऑनलाईन उपस्थित असलेले सर्व मान्यवर मंत्री, अधिकारी, कर्मचारी यांचे आभार मानले.
कोण काय म्हणाले
महसूल मंत्री – शासनाच्या लोकाभिमुख योजना जनतेपर्यंत पोहचविण्याचे काम महसूल विभाग करीत आहे. कोरोनाच्या परिस्थितीचे गांभीर्य लक्षात घेता नाशिक विभाग व्हिडीओ कॉन्फरन्सिंगच्या माध्यमातून साजरा करत असलेला ऑनलाईन महसूल दिनाचा उपक्रम अतिशय स्तुत्य आहे. कोविडच्या काळात महसूल विभाग आपली भूमिका कार्यक्षमपणे पार पाडत असून राज्याचे आर्थिक व्यवहार सुरळीतपणे सुरू ठेवण्यासाठी देखील प्रयत्न करीत आहे. सर्वसामान्य नागरीकांचे प्रश्न सोडविण्याची जबाबदारी महसूल विभाग पार पाडत असतो. असेही थोरात यांनी यावेळी सांगितले.
पालकमंत्री – नवीन तंत्रज्ञानाच्या सहाय्याने नाशिक विभागातील साधारण २ हजार ५०० अधिकारी कर्मचारी ऑनलाईन एकत्र येण्यास मदत झाली आहे. महसूल विभागाचे काम हे २४ तास व ३६५ दिवस अविरतपणे सुरू असलेले आहे. कोणतीही परिस्थिती असो महसूल विभागाची जबाबदारी ही अत्यंत महत्वाची असते. याअनुषंगाने केलेल्या कामाची वरिष्ठ पातळीवर दखल घेवून शाबासकीची थाप मिळणे आवश्यक आहे, त्यामुळे काम करतांना सकारात्मक उर्जा ही प्रत्येकाला मिळत असते, असे भुजबळ म्हणाले.
कृषीमंत्री – महसूल विभाग हा सर्व विभागांचे प्रतिनिधीत्व करीत असून इतर विभागांवर याविभागाचे नियंत्रण असते. येणाऱ्या काळात सर्वसामान्य नागरिकांना महसूल विभागाच्या माध्यमातून न्याय देण्यात यावा. त्याचप्रमाणे महसूल विभागातील अर्धन्यायिक कामकाजासाठी ठराविक कालावधीचे वेळापत्रक असावे, अशी अपेक्षा भुसे यांनी व्यक्त केली.
