औरंगाबाद (इंडिया दर्पण वृत्तसेवा) – शहर पोलिस दलातील गुन्हे शाखेचे सहायक पोलिस आयुक्त विशाल ढुमे यांनी दारूच्या नशेत धावत्या कारमध्ये एका महिलेशी अश्लील चाळे केले. घरी गेल्यावर त्या महिलेच्याच बेडरूममधील वॉशरूम वापरण्यासाठी आग्रह करीत तिचा पती, दीर, सासूला शिवीगाळ व धक्काबुक्की केली. हा प्रकार शनिवारी मध्यरात्रीनंतर 2.30 वाजताच्या सुमारास घडला. याप्रकरणी ढुमेंविरोधात विनयभंगासह घरात घुसल्याचा गुन्हा नोंदविण्यात आला आहे. ही घटना उघडकीस येताच पोलिस दलात खळबळ उडाली आहे. दरम्यान, याप्रकरणी ढुमे यांना न्यायालयाने १४ दिवसांची न्यायालयीन कोठडी सुनावली आहे.
पीडिता, पती, मुलीसह एका रेस्टॉरंटमध्ये रात्री जेवण्यासाठी गेली होती. तिथे ढुमे मित्रांसह आले होते. पीडितेच्या पतीची ढुमेंसोबत ओळख होती. ढमेंनी पीडितेच्या पतीला पोलिस आयुक्तालयासमोर सोडण्याची विनंती केली. पावणेदोन वाजता सर्व कारने निघाले. पीडिता पुढील सीटवर मुलीसह बसली होती. ढुमे मागच्या सीटवर होते. त्यांनी मागून पीडितेसोबत अश्लील चाळे सुरू केले. नंतर ते पीडितेच्या घरी गेले. पीडितेच्या बेडरूममधील वॉशरूम वापरण्याचा आग्रह केला. ढुमेंनी सासू आणि पतीला शिवीगाळ केल्याचा आरोप आहे. या घटनाक्रमानंतर पतीने पोलिसांना बोलवले. नागरिकही धावले. पोलिस ढुमेंना घेऊन गेले.
तडकाफडकी बदली
पोलिस आयुक्त डॉ. गुप्ता यांनी एसीपी ढुमे यांची तडकाफडकी नियंत्रण कक्षात बदली केली. घटनेचा अहवाल गृह मंत्रालयाला पाठवला. निलंबनाचा निर्णय गृह मंत्रालयस्तरावरच होईल, असे वरिष्ठ अधिकाऱ्यांनी सांगितले.
यापूर्वीही वादात
ढुमे यांचे हे काही पहिलेच प्रकरण नाही. यापूर्वीही ते वादात राहिले आहेत. अहमदनगरला असतानाही ढुमेंनी दारू पिऊन गोंधळ घातला होता. नवरदेवाला वरातीत मारहाण केलेली. इतकेच नाही तर शहरातल्या काही महिला पोलिस कॉन्स्टेबलनीही ढुमेंबाबत तक्रारी केल्याची माहिती सूत्रांनी दिली आहे. आता औरंगाबाद पोलिस आयुक्तांनी कारवाई केली असून, पुढील तपास सुरू आहे. ढुमे यांची बदली करुन चालणार नाही. थेट निलंबनाची कारवाई करावी, अशी मागणी केली जात आहे.
Women Molestation Aurangabad ACP Vishal Dhume Transfer