दिंडोरी (इंडिया दर्पण वृत्तसेवा) – वणी ते सापुतारा रोडवर प्रिंप्री अंचला फाट्याचे पुढे भीषण रस्ते अपघात झाला आहे. सुरगाण्याहून नाशिककडे येणाऱ्या एसटी बसने मोटार सायकलला जोरदार धडक दिली. त्यामुळे या अपघातात ४ महिन्याच्या चिमुकलीसह तिघे जण ठार झाले आहेत. तिघे मृत एकाच कुटुंबातील आहेत.
पोलिसांनी दिलेल्या माहितीनुसार, अपघातातील मृत कुटुंब निफाड तालुक्यातील सारोळा येथील आहेत. विशाल नंदू शेवरे (वय २४),
सायली विशाल शेवरे (वय २०), अमृता विशाल शेवरे (वय ४ महिने) अशी मृतांची नावे आहेत. अपघात ज्या बसने झाला ती बस कळवण डेपोची आहे. ही बस सुरगाणा येथून नाशिककडे येत होती. त्यावेळी पिंप्रीअंचला फाटा येथे हा अपघात झाला .
बसमधील काही प्रवासीही या अपघातात जखमी झाले आहेत. जखमी प्रवाशांमध्ये मंजुळा एकनाथ वाघमारे (वय 28 वर्ष हनुमंतपाडा), देविदास तुळशीराम भोये (वय 30 वर्ष, उमरेमाळ), तारा रमेश कुवर, व रमेश नाथा कुवर (रा.गंगोत्री अपार्टमेंट, निमाणी, नाशिक) यांच्या छातीला गांभीर दुखापत झाली आहे. तर, कृष्णा त्र्यंबक गांगोडे (वय 26 वर्ष, गाव उंडओहळ, ता सुरगाणा, जि नाशिक) यांच्या हाताच्या बोटांना दुखापत झाली आहे. बस चालकाचे नाव अशोक सखाराम गांगोडे असे आहे. पुढील तपास सहाय्यक पोलीस निरीक्षक स्वप्नील राजपूत यांच्या मार्गदर्शनाखाली वणी पोलीस स्टेशन करीत आहे.
Vani Saputara Road Accident 4 Death with Small Girl