ठाणे (इंडिया दर्पण वृत्तसेवा) – राज्यातील सत्ताधारी शिंदे गटातच दोन गट पडल्याचे दिसून येत आहे. शिवसेनेत बंडखोरी करीत बाहेर पडलेल्या शिंदे गटात धुसफूस सुरू असल्याचे वारंवार बोलले जाते. मात्र, उल्हासनगरमध्ये शिंदे गटातच तुफान हाणामारी झाल्याचे दिसून आले आहे. याप्रकरणी पोलिसांनी वेळीच धाव घेतली आणि आता परस्पर विरोधी गुन्हे दाखल झाले आहेत.
उल्हासनगर येथील कॅम्प नं. ४ येथील व्हीनस चौक ते श्रीराम चौक रस्ता पुनर्बांधणीपूर्वी नाल्याची पाहणी करण्यासाठी गेलेल्या शिवसेना शिंदे गटातील पदाधिकारी विजय जोशी तसेच माजी नगरसेवक विमल जोशी यांचे पती वसंत भोईर यांच्या समर्थकांमध्ये सोमवारी दुपारी जोरदार हाणामारी झाली. या प्रकाराने मोर्यानगरी रस्ता वादात सापडून विठ्ठलवाडी पोलिस ठाण्यात दोन्ही बाजूंच्या तक्रारींवरून परस्परविरोधी गुन्हे दाखल करण्यात आले. रात्री उशिरापर्यंत गुन्हे नोंदवण्याची प्रक्रिया सुरू होती.
मोर्यानगरीचा रस्ता कल्याण – डोंबिवली व उल्हासनगर महापालिकादरम्यान येतो. हा रस्ता उल्हासनगर महापालिकेने रिंग रोड म्हणून विकसित केला आहे. त्यामुळे अनेक वर्षे रस्त्याच्या पुनर्बांधणीचे काम रखडले होते. खासदार श्रीकांत शिंदे व स्थानिक आमदार गणपत गायकवाड यांच्या पाठपुराव्यामुळे एमएमआरडीएअंतर्गत १७ कोटींच्या निधीतून रस्ता पुनर्बांधणीला मंजुरी मिळून काम सुरू झाले. सोमवारी दुपारी एक वाजता कॅम्प नं. ४ येथील एसएसटी महाविद्यालयासमोरील नाल्याच्या रुंदीकरणाची पाहणी करण्यासाठी आशेळे गावचे शिवसेना शिंदे गटाचे पदाधिकारी विजय जोशी समर्थकांसह आले होते. तेव्हा शिंदे गटाच्या माजी नगरसेविका विमल भोईर यांचे पती वसंत भोईरही तेथे समर्थकांसह आले. दोन्ही गटांत शाब्दिक बाचाबाची होऊन त्याचे रुपांतर नंतर हाणामारीत झाले. यात तीनहून अधिक जण जखमी झाले आहेत. त्यांच्यावर मध्यवर्ती रुग्णालयात उपचार सुरू आहेत. या हाणामारीने शिंदे गटातील वाद उफाळून आल्याचे दिसत असून पक्षाकडून दोन्ही गटांना समज देण्यात येणार असल्याचे पक्षाच्या वरिष्ठांनी सांगितले.
पोलिसांनी तातडीने घेतली धाव
विठ्ठलवाडी पोलिस ठाण्याचे वरिष्ठ पोलिस निरीक्षक संजय गायकवाड यांना या घटनेची माहिती कळताच त्यांनी तणाव कमी करण्यसाठी घटनास्थळी धाव घेतली. तसेच वाद मिटवण्याचा प्रयत्न केला. सहायक आयुक्त मोतीचंद राठोड यांनीही घटनेचा आढावा घेतला. परस्परांविरोधात गुन्हे दाखल करण्याची प्रक्रिया सुरू आहे, अशी माहिती त्यावेळी राठोड यांनी दिली आहे.
Ulhasnagar Shinde Group Fight Politics FIR Police
