मुंबई (इंडिया दर्पण वृत्तसेवा) – शिंदे-फडणवीस सरकारचा मंत्रिमंडळ विस्तार झाला असला तरी त्यात ज्यांना संधी मिळाली नाही ते प्रचंड नाराज असल्याचे दिसून येत आहे. औरंगाबाद तथा संभाजीनगरचे आमदार संजय शिरसाठ हे आघाडीवर आहेत. मंत्रिमंडळ विस्तारात पत्ता कट झाल्याने ते एकनाथ शिंदे गटाची साथ सोडून उद्धव ठाकरे यांच्याकडे जाणार असल्याच्या जोरदार चर्चा सुरू झाल्या आहेत.
पुढच्या वेळेस तरी मंत्रिमंडळात समावेश होईल की नाही याबद्दल शिरसाठ यांच्या कार्यकर्त्यांना शंका वाटते, मात्र आपला दुसऱ्या टप्प्यात मंत्री म्हणून नक्कीच विचार होईल, अशी अपेक्षा त्यांना वाटते. दरम्यान त्यांनी एक ट्विट केल्याने पुन्हा एकदा खळबळ उडाली असून उलट सुलट चर्चा सुरू झाली आहे. बंडानंतर शिरसाठ शिंदे गटात सर्वात पहिले सहभागी झाले होते असे असतानाही त्यांना नुकत्याच झालेल्या मंत्रिमंडळ विस्तारात स्थान देण्यात आलेले नाही. त्यामुळे त्यांच्या या व्हिडिओनंतर त्यांनी एकनाथ शिंदेंना इशारा तर दिला नाही ना? अशी चर्चा सुरू झाली आहे. दरम्यान, काही वेळातच शिरसाट यांनी हे ट्वीट डिलीट देखील केले आहे.
जुन्या व्हिडिओचे ट्वीट डिलिट केल्यानंतर शिरसाटांनी आणखी एक ट्वीट करत काही गोष्टी नमुद केल्या आहेत. संजय शिरसाट यांच्या या ट्विटने राज्याचं राजकारण पुन्हा हादरवून सोडलेलं आहे. संजय शिरसाठ यांनी आपल्या ट्विट मधून उद्धव ठाकरे यांचा महाराष्ट्राचे कुटुंबप्रमुख असा उल्लेख केलेला आहे. तसेच उद्धव ठाकरे यांचं विधानसभेतलं एक भाषण ही त्यांनी त्या ट्विटला जोडलेलं आहे. त्यामध्ये उद्धव ठाकरे दिलेलं वचन आम्ही पाळतोच आणि दिलेला शब्द हा खरा करून दाखवतोच, असे म्हणताना दिसत आहेत.
सत्तासंघर्षाच्या लढाईत औरंगाबाद पश्चिमचे आमदार संजय शिरसाट यांनी उद्धव ठाकरेंना जय महाराष्ट्र केला आणि एकनाथ शिंदेंच्या गटाचा झेंडा खांद्यावर घेतला. मात्र सुरुवातीपासून शिंदे गटात सामील होऊनही शिरसाट यांना मंत्रिपद मिळालं नाही. अशातच काल रात्री संजय शिरसाट यांनी एक ट्वीट केलं.
मंत्रिमंडळात स्थान न मिळाल्यानं संजय शिरसाट यांनी उद्धव ठाकरेंचं भाषण ट्वीट करत शिंदे गटाला इशारा तर दिला नाही ना अशी आता चर्चा सुरु झाली आहे. ट्वीट डिलिट केल्यानंतर शिरसाट यांनी म्हटलं की, आम्ही आजही शिवसेना आहोत. जो आमचा नेता असतो तो आमचा कुटुंबप्रमुख असतो. बाळासाहेबांनंतर उद्धव साहेब आमचे कुटुंबप्रमुख आहोत. आम्ही उद्धव ठाकरे यांना नेहमीच कुटुंबप्रमुख मानत आलो आहोत. आज जरी आमचे भांडण जरी झालं असलं तरी आम्ही त्यांच्या विरोधात बोलू शकत नाही.
आम्ही दूर जरी झालो असलो तरी ते आमचे कुटुंबप्रमुख होतेच. त्यांनी घेतलेली भूमिका आम्हाला मान्य नव्हती. आमची भूमिका उद्धव ठाकरेंच्या विरोधात नव्हती. आमची भूमिका राष्ट्रवादी आणि काँग्रेसच्या विरोधात होती. विचार पटत नव्हते म्हणून आम्ही विभक्त झालो. याचा अर्थ नातं तोडलेलं नाही. आम्ही आमच्या भूमिकेवर तटस्थ राहिलो ते त्यांच्या भूमिकेवर तटस्थ राहिले. मंत्रिपदासाठी दबाव आणताय का असं विचारलं असता शिरसाट म्हणाले की, माझा स्वभाव तसा नाही. एखाद्यावर विश्वास ठेवला तर मान कापली गेली तरी हरकत नाही. मंत्रिपदासाठी मी भूकेलेला नाही. ज्या ठिकाणी चुकतं त्यावेळी बोलायला हवं. मला जे योग्य वाटतं ते मी स्पष्टपणे बोलतो. मंत्रिपद मिळालं किंवा नाही मिळालं हा विचार माझ्या डोक्यात कधीच येणार नाही, असंही शिरसाट म्हणाले.
शिरसाट म्हणाले की, मातोश्रीवर परत बोलावलं तर परत जायचं की नाही हा निर्णय एकनाथ शिंदे हेच घेतील. शिंदे जो निर्णय घेतील त्या निर्णयासोबत आम्ही असू, असं शिरसाट म्हणाले. जर तुम्ही कुटुंबप्रमुखांची भूमिका बजावत असाल तर त्यावेळी कुटुंबाचं मतही जाणलं पाहिजे. ते कुटुंबप्रमुख राहिले असते, त्यांना आम्ही मानतही आलो आहोत. मंत्रिपद हुकल्यावर संजय शिरसाट काल पहिल्यांदा औरंगाबादमध्ये पोहोचले. यावेळी त्यांनी मला मंत्रीपद मिळेल विस्तार पूर्ण अजून झालेला नाही असा आशावाद त्यांनी व्यक्त केला होता. तुमचं नाव यादीतून कोणी कापलं असं विचारल्यावर मिश्किलपणे उत्तर देत उद्धव ठाकरे मुख्यमंत्री होते त्याही वेळेस यादीतून माझं नाव कापलं आणि याही वेळेस कापले. मात्र निश्चितपणे पुढे मला मंत्रीपद मिळेल असं म्हणत एकनाथ शिंदेंवर मला विश्वास आहे असं संजय शिरसाट यांनी काल म्हटलं होते.
आमदारांनी बंडखोरीला मदत केली अशा अनेकांना पहिल्या टप्प्यातील मंत्रिमंडळ विस्तारात मंत्रिपद हवं होते, यामध्ये संजय शिरसाट आघाडीवर होते. परंतु पहिल्या टप्प्यातील मंत्रिमंडळ विस्तारात संजय शिरसाट यांचा पत्ता जवळपास कट झाला. संजय शिरसाट हे आधीपासूनच एकनाथ शिंदे यांच्यासोबत आहेत. त्यामुळे शिरसाट यांना देखील मंत्रिपदाची अपेक्षा होती. यावेळच्या विस्तारात तुमचं नाव नसेल. मात्र पुढच्या वेळी मंत्रिमंडळ विस्तार होईल त्यात तुमचं नाव निश्चित असेल. सध्या तरी तुम्हाला मंत्रिपद मिळणार नाही,” असे स्पष्ट संकेत संजय शिरसाट यांना देण्यात आले होते, त्यामुळे संजय शिरसाट अतिशय नाराज झाले होते.
Shivsena Rebel MLA Sanjay Shirsat Politics
Eknath Shinde Uddhav Thackeray Ministry
Cabinet Expansion