सटाणा (इंडिया दर्पण वृत्तसेवा)- सटाणा बाजार समितीच्या सभापती उपसभापती पदासाठी आज होणारी निवड प्रक्रिया सत्ताकेंद्राच्या अंतर्गत संघर्षामुळे कोरमअभावी तहकूब करण्यात आली. यशवंत शेतकरी पॅनलमधील नेत्यांमध्ये एकमत न झाल्याने पॅनलचे ८ व शेतकरी विकास पॅनलचा १ संचालक अनुपस्थित राहिले. त्यामुळे आवश्यक कोरम न भरल्याने निवड प्रक्रिया पुढे ढकलण्यात आली.
अत्यंत चुरशीच्या निवडणुकीत यशवंत शेतकरी विकास पॅनलने १३ पैकी ९ जागा जिंकून बहुमत सिद्ध केले होते. त्यांना शेतकरी विकास पॅनलच्या एका संचालकाचा पाठिंबा मिळाल्याने सत्ता स्थापन होणार हे जवळपास निश्चित मानले जात होते. निवडीनंतर पॅनलचे सर्व संचालक १८ दिवसांच्या सहलीवर गेले होते. रविवारी रात्री ते परतले, मात्र सभापती निवडीच्या पूर्वसंध्येला पॅनलमधील नेत्यांमध्ये गटबाजी समोर आली.
सभापतीपदासाठी रवींद्र सोनवणे आणि माजी जि.प. सदस्या सिंधुताई सोनवणे या दोघांची नावे आघाडीवर होती. माजी सभापती संजय सोनवणे, डॉ. प्रशांत सोनवणे आणि गजेंद्र चव्हाण यांच्या उपस्थितीत बैठका झाल्या. मात्र रवींद्र सोनवणे यांचा ठाम आग्रह व संजय सोनवणे यांचा पत्नी सिंधुताई यांना सभापती करण्याचा आग्रह यामुळे मतैक्य साधले गेले नाही.
अखेर आज सकाळी होणाऱ्या सभेवेळी यशवंत शेतकरी पॅनलचे ८ व त्यांच्यासोबत असलेला शेतकरी विकास पॅनलचा एक संचालक गैरहजर राहिल्याने सभापती निवड प्रक्रिया कोरमअभावी तहकूब करण्यात आली.या घडामोडींमुळे तालुक्यात राजकीय चर्चांना उधाण आले असून, पुढील रणनीती कशी ठरते याकडे सगळ्यांचे लक्ष लागले आहे.
