सप्तश्रृंगगड – श्रीक्षेत्र सप्तश्रृंगगडावर कोजागिरी पौर्णिमेला तृतीयपंथींचा मेळावा संपन्न झाला. या मेळाव्यासाठी सप्तशृंगगडावर राज्यभरातील तृतीयपंथी दाखल झाले होते. यात मुंबई, पुणे, कल्याण, नाशिकसह, गुजरात व मध्य प्रदेशातील तृतीयपंथींचाही समावेश होता. तृतीयपंथींकडून कोजागिरी पौर्णिमेनिमित्त देवीचा छबिना म्हणजे मिरवणूक काढण्यात आली. यानंतर रात्री त्यांचा मेळावा भरला. यात त्यांच्या गुरूला शिष्याकडून भेट देण्याची पंरपरा आहे. शिष्याला दीक्षा देण्याचाही कार्यक्रम झाले. रात्रभर जागर करून देवीच्या गीतांचे गायन करण्यात आले. तसेच ठिकठिकाणच्या कार्यक्रमात जाऊन तृतीयपंथींनीही नृत्य केले. पौर्णिमेला तृतीयपंथीयांची मोठ्या प्रमाणावर गडावर उपस्थिती असते. सवाद्य मिरवणुकीत सुवर्णालंकार परिधान करून तृतीयपंथी सहभागी होतात. पौर्णिमेला सायंकाळी अभिषेक प्रारंभाची प्रतिवर्षीची परंपरा आहे. रात्री १२ वाजता अभिषेक पूर्णाहुती व कोजागरीची सांगता असे नियोजन असते. कावडधारकांना प्रवेशासाठी स्वतंत्र मार्ग असतो. यामार्गावर आरोग्य सुविधा, पिण्याचे पाणी आदी सुविधा उपलब्ध करून देण्यासाठी नियोजन आखण्यात आले आहे. तसेच पोलिस प्रशासन, महसूल, विविध शासकीय विभाग व विश्वस्त संस्था कर्मचाऱ्यांच्या सतर्क बंदोबस्तात तृतीयपंथी यांची छबिना व कावडधारकांची मिरवणूक काढण्यात आली.
https://youtu.be/izNt6Oo3tkk