इंडिया दर्पण ऑनलाईन डेस्क – बाबर आझमच्या नेतृत्वाखालील पाकिस्तान संघाने पहिल्या उपांत्य फेरीत न्यूझीलंडचा ७ गडी राखून पराभव करून अंतिम फेरीत प्रवेश केला आहे. पाकिस्तानने तब्बल १३ वर्षांनंतर टी-२० विश्वचषकाची अंतिम फेरी गाठली आहे. या संघाने शेवटच्या वेळी २००९ मध्ये अंतिम सामना खेळला होता आणि त्यादरम्यान संघ विजेतेपद पटकावण्यात यशस्वी ठरला होता. १० नोव्हेंबरला भारत आणि इंग्लंड यांच्यात दुसरा उपांत्य सामना खेळवला जाणार आहे, जर रोहित शर्माचा संघ या सामन्यात विजय नोंदवण्यात यशस्वी ठरला तर १३ नोव्हेंबरला भारत आणि पाकिस्तान यांच्यातील विजेतेपदाची लढाई चाहत्यांना पाहायला मिळेल.
या सामन्यात प्रथम फलंदाजी करताना डॅरिल मिशेलच्या अर्धशतकाच्या जोरावर न्यूझीलंडने १५२ धावा केल्या होत्या. बाबर आझम आणि मोहम्मद रिझवान यांच्या उत्कृष्ट भागीदारीच्या जोरावर पाकिस्तानने ५ चेंडू राखून ही धावसंख्या गाठली. बाबर आणि रिझवान यांच्यात पहिल्या विकेटसाठी शतकी भागीदारी झाली.
१५३ धावांच्या लक्ष्याचा पाठलाग करताना मोहम्मद रिझवानने पाकिस्तान संघाला आक्रमक सुरुवात करून बाबर आझमचे दडपण दूर केले. आतापर्यंतच्या विश्वचषकात या दोन्ही खेळाडूंची बॅट शांत होती, पण उपांत्य फेरीसारख्या मोठ्या टप्प्यावर बाबर-रिजवान दोन्ही संघांच्या अपेक्षांवर खरा उतरला. दोन्ही फलंदाजांनी पहिल्या विकेटसाठी १०५ धावांची भागीदारी केली. बाबर आझमला ट्रेंट बोल्टने वैयक्तिक ५३ धावांवर बाद करून संघाला पहिला धक्का दिला. यानंतर १३२ धावांवर बोल्टने रिझवानलाही पॅव्हेलियनचा रस्ता दाखवला. रिझवानने ५७ धावांची शानदार खेळी केली. लक्ष्य गाठताना संघाला तिसरा धक्का मोहम्मद हरिसच्या रूपाने बसला, जो २६ चेंडूत ३० धावा करून बाद झाला.
उपांत्य फेरीच्या सामन्यात केन विल्यमसनच्या नेतृत्वाखालील न्यूझीलंड संघाने नाणेफेक जिंकून प्रथम फलंदाजी केली. डॅरेल मिशेलच्या अर्धशतकाच्या जोरावर किवी संघाने पाकिस्तानसमोर विजयासाठी १५३ धावांचे लक्ष्य ठेवले आहे. मिचेलने विल्यमसनसोबत ६८ आणि नीशमसोबत नाबाद ३५ धावांची भागीदारी केली. मिचेलने ३५ चेंडूंत ३ चौकार आणि १ षटकाराच्या मदतीने ५३ धावांची नाबाद खेळी खेळली. पाकिस्तानकडून शाहिद आफ्रिदीने दोन बळी घेतले.
Pakistan T20 World Cup 2022 Final