पाचोरा (इंडिया दर्पण वृत्तसेवा) – भडगाव विधानसभेचे शिवसेनेचे बंडखोर आमदार किशोरआप्पा पाटील यांना आता घरातून आव्हान मिळाले आहे. किशोरआप्पा यांनी शिंदे गटाला साथ दिल्यानंतर बहुतांश शिवसैनिक त्यांच्याबरोबर गेले. पण, त्यांच्या चुलत भगिनी वैशाली सुर्यवंशी यांनी शिवसेना पक्षप्रमुख यांना साथ दिली आहे. आज वाढदिवसानिमित्त त्यांनी वृत्तपत्रात शुभेच्छाच्या जाहिराती देऊन शहरात फलकही लावले. वैशाली सुर्यवंशी यांनी आपण शिवसेनेतच राहणार असून अखेरपर्यंत उध्दव ठाकरे यांची साथ सोडणार नसल्याचे स्पष्ट केले. यावेळी त्यांनी मी राजकारणापेक्षा समाजकारणावर भर देत असून सध्या तरी उमेदवारीचा विचार केला नसल्याचे सांगितले.
वैशाली सुर्यवंशी या माजी आमदार व निर्मल गृह उद्योग समुहाचे व्यवस्थापकीय संचालक कै. आर.ओ. पाटील यांच्या कन्या आहेत. त्या थेट राजकारण सक्रिय नव्हत्या. पण, शिवसेना पक्षप्रमुख उध्दव ठाकरे यांच्या वाढदिवसानिमित्त त्यांनी शुभेच्छाचे बॅनर लावल्यामुळे त्यांचे हे बॅनर पाचोरा – भडगाव मतदार संघात चर्चेचा विषय ठरला आहे.
Pachora Shivsena Rebel MLA Kishor Patil Challenge Home Family Jalgaon