नागपूर (इंडिया दर्पण वृत्तसेवा) – महाविकास आघाडीने विधानसभा अध्यक्ष राहुल नार्वेकर यांच्याविरोधात अविश्वास ठरावाचा प्रस्ताव दिला. मात्र महाविकास आघाडीचे घटकपेक्षा असलेले शिवसेना, राष्ट्रवादी काँग्रेस आणि काँग्रेस या पक्षांमध्ये एकजूट नसल्याचे दिसून येत आहे. विधानसभाध्यक्षांवरील अविश्वास प्रस्तावावर विरोधी पक्षनेते अजित यांची सही नसल्याचे समोर आले आहे. यासाठी अजित पवारांना विश्वासात घेतलेली दिसत नाही. त्यामुळे अविश्वास ठराव नेमका कोणाविरूद्ध आहे. विधानसभा अध्यक्षांविरोधातील की विरोधी पक्षनेते अजित पवार यांच्याविरोधातला आहे, अशी चर्चा राजकीय वर्तुळात रंगत आहे.
हिवाळी अधिवेशन पहिल्या दिवसापासूनच वादळी ठरले. सर्वप्रथम सीमावादाचा मुद्दा गाजला. त्यानंतर गायरान जमीन घोटाळा केल्याचा आरोप करत कृषी मंत्री अब्दुल सत्तार यांच्या राजीनाम्याची मागणी विरोधकांनी केली. तर दुसरीकडे, कर्नाटक विरोधी ठराव संमत करण्यात आला. आज अधिवेशनाचा संपले आहे. त्याचवेळी विधानसभा अध्यक्ष राहुल नार्वेकर यांच्याविरोधात महाविकास आघाडीने अविश्वास ठरावाचा प्रस्तावाचे पत्र विधानसभा सचिव राजेंद्र भागवत यांच्याकडे दिले आहे.
अविश्वासाच्या या प्रस्तावावर विरोधी पक्षनेते अजित पवार यांची सही नसल्यामुळे महाविकास आघाडीमध्ये एकजूट नसल्याच्या चर्चा राजकीय वर्तुळात सुरू आहेत. राज्याच्या हिवाळी अधिवेशनाचा आज शेवटचा दिवस होता. अविश्वासाच्या या ठरावाबद्दल आपल्याला काहीच माहिती नसल्याची प्रतिक्रिया अजित पवार यांनी दिल्यामुळे विरोधी पक्षांमध्ये नेमके काय चालले आहे? असा प्रश्न उपस्थित होत आहे. या पार्श्वभूमीवर शिंदे गटाकडून अजित पवारांच्या या विधानावर खोचक टोला लगावण्यात आला आहे. दरम्यान, मविआच्या काही नेत्यांनी विधानसभा सचिवांना पत्र देत विधानसभा अध्यक्ष राहुल नार्वेकर यांच्याविरोधात अविश्वास ठराव दाखल केला.
काँग्रेस आमदार सुनिल केदार, सुरेश वरपुडकर, शिवसेना आमदार सुनील प्रभू आणि राष्ट्रवादी काँग्रेसचे आमदार अनिल पाटील यांनी हे पत्र विधानसभा सचिवांना दिल्याचे सांगितले जात आहे. या पत्रावर ३९ आमदारांची सही असल्याचेही बोलले जात आहे. विरोधी पक्षातील शिवसेना, काँग्रेस आणि राष्ट्रवादीच्या आमदारांनी आरोप केला आहे की आम्हाला सभागृहात बोलू दिले गेले नाही. विधानसभा अध्यक्ष पक्षपातीपणा करीत आहेत. कर्नाटकविरोधात आणि सीमावासीयांच्या पाठिंब्यासाठी ठराव मंजूर करताना विरोधी पक्षाच्या आमदारांना बोलण्याची परवानगी मागूनही नाकारण्यात आल्याचाही आरोप आमदारांनी केला आहे.
अविश्वास ठरावाबद्दल आपल्याला काहीच माहिती नसल्याचे अजित पवार म्हणाले. सध्या तरी अध्यक्ष एक वर्षांचा कार्यकाळ पूर्ण करेपर्यंत अशाप्रकारचा अविश्वास ठराव मांडता येत नाही. जर मी सहमती दर्शवली तर त्यावर माझी स्वाक्षरी आवश्यक असेल. मी या प्रकरणामध्ये नक्कीच लक्ष घालणार आहे, असे अजित पवार म्हणाले. त्यामुळे महाविकास आघाडीमध्ये सुसंवाद नसल्याची चर्चा सुरू झाली आहे. तसेच अध्यक्षांविरोधातल्या अविश्वासाच्या या ठरावाने विरोधी पक्षनेते अजित पवार यांच्याबद्दलच अविश्वासाचे वातावरण तयार झाले आहे. मात्र, पक्षप्रमुखांच्या संमतीने आम्ही अविश्वास ठरावाच्या पाठिशी असल्याची भूमिका शिवसेनेच्या उद्धव ठाकरे गटाने घेतली आहे.
Opposition Leader Ajit Pawar Politics MVA MLA
Maharashtra Assembly Winter Session Nagpur
Speaker No Confidence Letter Signature