मुंबई (इंडिया दर्पण वृत्तसेवा) – कोरोना विषाणूच्या रुग्णांमध्ये देशभरात पुन्हा एकदा वाढ झाल्याचे दिसून येत आहे. महाराष्ट्र आरोग्य विभागाने याबाबत माहिती दिली असून, दोन रुग्णांना ओमायक्रॉनचा सबव्हेरियंट बीए.5 ची लागण झाल्याचं निष्पन्न झाले असल्याचे विभागाने म्हणले आहे. दोन रुग्णांचे नमुने एनआयव्ही पुण्यात पाठवण्यात आले होते. हे दोन्ही रुग्ण महाराष्ट्राच्या बाहेरील आहेत. मात्र, सध्या व्यावसायिक कारणास्तव पुण्याच्या ग्रामीण भागांत वास्तव्यास असल्याचे समोर आले आहे.
गेल्या काही दिवसांपासून कोरोना रुग्णांमध्ये वेगाने वाढ होत असल्याचे पाहायला मिळत आहे. परंतु, कोरोनामुक्त होणाऱ्या रुग्णांच्या संख्याही चांगली आहे. गेल्या अनेक दिवसांपासून अशी परिस्थिती असताना महाराष्ट्रात ओमायक्रॉन सबव्हेरियंट बीए.५ ची लागण झाल्याले रुग्णाची नोंद करण्यात आली आहे. आरोग्य विभागाने दिलेल्या माहितीनुसार, दुबईहून परतल्यानंतर पुणे विमानतळावर नियमित तपासणी दरम्यान या दोन रुग्णांचा अहवाल पॉझिटिव्ह आल्याचे समोर आले होते. सध्या दोन्ही बाधित रुग्णांमध्ये कोणत्याही प्रकारची विशेष लक्षणे दिसून आलेली नाहीत. त्यांना विलगीकरणात ठेवण्यात आल्यानंतर आता ते कोरोनामुक्त झाले आहेत.
राज्यात ओमायक्रॉनच्या BA.4 आणि BA.5 सब-व्हेरियंट्सच्या प्रकरणांमध्ये मोठी वाढ होत आहे. आतापर्यंत ओमिक्रॉनच्या BA.4 आणि BA.5 सब-व्हेरियंट्सच्या रुग्णांची संख्या १६० वर पोहोचली आहे. त्यात पुण्यातील ९३, मुंबईतील ५१, ठाण्यात ५, नागपूरमधील ४, पालघरमधील ४ आणि रायगडमधील ३ जणांचा समावेश आहे.
महाराष्ट्रात शुक्रवारी २५१५ नव्या रुग्णांची भर पडली आहे तर २४४९ रुग्ण बरे होऊन घरी परतले आहेत. तसेच एकूण सहा कोरोनाबाधितांचा मृत्यू झाला आहे. राज्यात आतापर्यंत एकूण ७८ लाख ६७ हजार २८० कोरोनाबाधित बरे होऊन घरी परतले आहेत. त्यामुळे राज्यातील रुग्ण बरे होण्याचे प्रमाण हे ९७.९७ टक्के इतकं झालं आहे. तसेच राज्यातील मृत्यूदर हा १.८४ टक्क्यांपर्यंत आला आहे.
Omicron Sub Variant ba 5 patient found in this city of Maharashtra