नाशिक (इंडिया दर्पण वृत्तसेवा) – शहरासह जिल्ह्यातून पुन्हा एकदा पक्षांतरासाठी अनेक नेते आणि पदाधिकारी नागपूरकडे रवाना झाले आहेत. त्यामुळे नाशिकच्या राजकीय वर्तुळात एकच खळबळ उडाली आहे. केवळ शिवसेनेच्या ठाकरे गटच नाही तर राष्ट्रवादी काँग्रेस आणि अन्य पक्षातील पदाधिकारीही शिंदे गटात आज प्रवेश करणार आहेत. आज रात्री हा प्रवेश सोहळा नागपुरात होणार असल्याचे सांगितले जाते. त्यात कोण कोण सहभागी होते याकडे सगळ्यांचे लक्ष लागले आहे.
पाच महिन्यापूर्वी राज्यात मोठा राजकीय भूकंप झाला. शिवसेना पक्षात मोठी फूट पडली. एकनाथ शिंदे यांच्या नेतृत्वाखाली तब्बल ४० पेक्षा आमदारांनी बंड केले. त्यानंतर १३ खासदारही शिंदे गटाक सहभागी झाले. भाजपने शिंदे गटाला पाठिंबा देत राज्यामध्ये सरकार स्थापन केले आहे. नाशिकमधून खासदार हेमंत गोडसे, तत्कालिन मंत्री दादा भुसे, आमदार सुहास कांदे हे शिंदे गटात सहभागी झाले. त्यानंतर ठाकरे गटाला नासकात हादरे बसत आहेत. काही दिवसांपूर्वीच ठाकरे गटाचे तब्बल ११ माजी नगरसेवक शिंदे गटात गेले आहेत. त्यात माजी विरोधी पक्ष नेते अजय बोरस्ते यांचाही समावेश आहे. यास काही दिवस उलटत नाही तोच नाशिकचे संपर्कप्रमुख भाऊ चौधरी यांनीही शिंदे गटाचा झेंडा हाती घेतला. आता बाळासाहेबांची शिवसेना या पक्षात त्यांना सचिवपदी बढती मिळाली आहे. आणि आता माजी आमदारांसह काही पदाधिकारीही नागपूरच्या दिशेने रवाना झाले आहेत. दिंडोरीचे माजी आमदार धनराज महाले, नाशिक महापालिकेच्या माजी नगरसेविका मंदिकिनी जाधव, मनसेच्या माजी नगरसेविका मेघा साळवे, राष्ट्रवादी काँग्रेसचे माजी नगरसेवक हरिश भडांगे आदींसह अनेक पदाधिकारी व नेते नागपूरकडे रवाना झाले आहेत.
हे सर्व जण समृद्धी महामार्गाने नागपूर गाठणार आहेत. सध्या विधिमंडळाचे अधिवेशन नागपुरात सुरू आहे. मुख्यमंत्री शिंदेंसह बाळासाहेबांची शिवसेनाचे अनेक पदाधिकारी नागपुरातच आहेत. आज रात्री होणाऱ्या या प्रवेश सोहळ्यात नाशिकचे पालकमंत्री दादा भुसे, खासदार हेमंत गोडसे, महानगर प्रमुख बंटी तिदमे यांच्यासह अनेक पदाधिकारी उपस्थित राहणार असल्याचे सांगितले जाते. शिंदे गटात नक्की कोण कोण प्रवेश करते याकडे सगळ्यांचे लक्ष लागले आहे.
Nashik Political Leaders Today Join Shinde Group
Nagpur Politics Eknath Shinde Balasahebanchi Shivsena