नाशिक (इंडिया दर्पण वृत्तसेवा) – नाशिककरांसाठी नववर्षाच्या स्वागताला आणखी एक मोठी गुडन्यूज आहे. ती म्हणजे ओझर येथील नाशिक विमानतळावर इमिग्रेशन सुविधा पूर्ण झाली आहे. त्यास केंद्रीय गृहमंत्रालयाने मान्यता दिली आहे. त्यामुळे आता नाशिक हे खऱ्या अर्थाने आंतरराष्ट्रीय विमानतळ बनले आहे. त्यामुळे आंतरराष्ट्रीय विमानसेवेचा मार्ग मोकळा झाला आहे. आगामी काळात नाशिक विमानतळावरुन थेट आंतरराष्ट्रीय सेवा सुरू होणार आहे.
नाशिक विमानतळाचे व्यवस्थापन हिंदुस्तान एरोनॉटिक्स लिमिटेड (एचएएल)कडे आहे. राज्य सरकार आणि एचएएल यांनी संयुक्त पद्धतीने नाशिक विमानसेवेला वेग दिला आहे. विमानतळावरील आंतरराष्ट्रीय उड्डाण ऑपरेशन्स हाताळण्यासाठी एचएएलने २ कोटी रुपयांहून अधिक खर्च करून पायाभूत सुविधा तयार केल्या आहेत. केंद्रीय गृहमंत्रालयाच्या मंजुरीनंतर इमिग्रेशन चेकपॉईंटसाठी आवश्यक असलेल्या पायाभूत सुविधांवर नोव्हेंबर २०२० मध्ये काम सुरू झाले. मुंबईच्या इमिग्रेशन ब्युरोने आंतरराष्ट्रीय आगमन आणि निर्गमन, सीमाशुल्क कार्यालय, इमिग्रेशन काउंटर इत्यादी सुविधा उभारण्यासाठी मार्गदर्शन केले. एचएएलने विमानतळावरील देशांतर्गत आणि आंतरराष्ट्रीय विंग वेगळे केले आहेत आणि दोन्ही विभागांवर स्वतंत्रपणे प्रवेश आणि निर्गमन विभाग तयार केले आहेत. इमिग्रेशन ब्युरोने अंतिम तपासणी केली आहे. त्यानंतर केंद्रीय गृह मंत्रालयाने इमिग्रेशन चेक पॉइंट्स कार्यान्वित करण्यास मान्यता दिली आहे. एचएएलच्या कसोशीच्या प्रयत्नांमुळे हे यशस्वी झाले आहे.
नाशिक ग्रामीण पोलिस
नाशिक ग्रामीण पोलिसांकडून आता विमानतळाच्या ठिकाणी पोलिसांची नियुक्ती करण्यात येईल. जिल्हा पोलिस अधिक्षक शहाजी उमप यांच्यावतीने येत्या काही दिवसातच यासंदर्भातील निर्णय अपेक्षित आहे. पोलिसांची नियुक्ती झाल्यानंतर इमिग्रेशन विभाग कार्यरत होईल. तसेच, या पोलिस कर्मचाऱ्यांचा पगार केंद्रीय गृहमंत्रालयाकडून केला जाणार आहे.
असा होणार फायदा
इमिग्रेशन सुविधा कार्यन्वित झाल्याने आंतरराष्ट्रीय विमानसेवा सुरू होण्याचा मार्ग मोकळा झाला आहे. त्यामुळे थेट आंतरराष्ट्रीय विमाने नाशिकला येतील आणि येथून जाऊ शकतील. मुंबई विमानतळावर अनेकदा सिग्नलची वाट पाहणारी आंतरराष्ट्रीय विमाने अहमदाबादला वळविली जातात. ही विमानेसुद्धा नाशिकला येऊ शकणार आहेत. तसेच, नाशिकला पार्किंगची सुविधा उपलब्ध असल्याने नाईट पार्किंग आणि दिवसाही विमाने पार्किंग करण्याठी येऊ शकतील. या सुविधेचा नाशिकच्या कार्गो सेवेलाही लाभ होणार आहे. नाशकातील कृषीमाल आणि अन्य उत्पादनांच्या निर्यातीलाही फायदा होणार आहे. तसेच, मुंबई विमानतळावर कार्गो विमानांनाही मोठी प्रतीक्षा करावी लागते. ही विमानेही ओझरला येऊ शकणार आहेत.
Nashik is Now International Airport Immigration Facility Approved
Ozar Ojhar Airport Air Service Flight Aviation
