नाशिक (इंडिया दर्पण वृत्तसेवा) – अन्न व औषध प्रशासन नाशिक पथकाने तपोवन येथील मेसर्स देवीकृपा फूड प्रॉडक्ट्स या फरसाण उत्पादकाच्या कारखान्यावर धाड टाकत १ लाख ११ हजार ५५० रुपये किमतीचा साठा जप्त केला. या ठिकाणी अन्नपदार्थाचे विनापरवाना उत्पादन व विक्री करत असल्याचे आढळून आले. या ठिकाणाहून लसूण फरसाण, मद्रास फरसाण, लाल शेव, पिवळी शेव, भावनगरी शेवचे नमुने विश्लेषणासाठी घेऊन उर्वरित साठा जप्त करण्यात आल्याची माहिती अन्न व औषध प्रशासनाने दिली.
या मोहिमेत एकूण पाच अन्न नमुने विश्लेषणासाठी घेण्यात आले असून विश्लेषण अहवाल प्राप्त होताच अन्नसुरक्षा व मानके कायदा २००६ अन्वये पुढील कारवाई करण्यात येणार आहे. सदरची धडक मोहीम ही यापुढेही सुरू राहणार आहे. अन्न व्यवसायिकांनी फरसाण उत्पादकांनी आवश्यक परवाना घेऊन परिशिष्ट चार अंतर्गत तरतुदींचे पालन करून व्यवसाय करावा. तसेच उत्पादन साठवून वाहतूक व विक्री आरोग्यदायी वातावरणात करण्याबाबत निर्देश प्रशासनाने दिले.
यावेळी फरसाण उत्पादकांनी अन्नपदार्थात भेसळ करू नये, भेसळ करताना आढळून आल्यास संबंधितांवर कारवाई केली जाईल तसेच मेसर्स देवी कृपा फूड प्रॉडक्ट्स या विनापरवाना व्यवसाय करणाऱ्या पेढीस ज्या विक्रेत्यांनी कच्चे अन्नपदार्थ विक्री केले आहेत. त्यांच्यावर देखील नियमानुसार कारवाई करण्यात येत असल्याचेही त्यांनी सांगितले. यावेळी नागरिकांना प्रशासनातर्फे आवाहनही करण्यात आले. फरसाण खरेदी करताना लेबल वरील मजकूर तपासून खरेदी करावे व पक्के बिल घ्यावे भेसळयुक्त फरसाण किंवा इतर अन्नपदार्थ संबंधी माहिती असल्यास प्रशासनाच्या टोल फ्री क्रमांक १८००२२२३६५ या क्रमांकावर संपर्क करावा ही कारवाई संजय नारागुडे (सह आयुक्त नाशिक विभाग) यांचे मार्गदर्शनाखाली मनीष सानप (सहाय्यक आयुक्त (अन्न)) अन्नसुरक्षा अधिकारी अमित रासकर व अविनाश दाभाडे (गुप्त वार्ता शाखा) यांनी केली.
Nashik FDA Farsan Company Raid Adulteration
