नाशिक (इंडिया दर्पण वृत्तसेवा)- नाशिकरोड येथील मुक्तीधाम भागात भरदिवसा झोल्या घरफोडीत चोरट्यांनी सुमारे अडीच लाखाच्या ऐवजावर डल्ला मारला. त्यात सोन्याचांदीच्या दागिन्यांचा समावेश आहे. याप्रकरणी उपनगर पोलीस ठाण्यात गुन्हा दाखल करण्यात आला आहे.
भारती साहेबराव आहिरे (रा.मुक्तीधाम मंदिरामागे आनंदनगर) यांनी याबाबत फिर्याद दिली आहे. आहिरे कुटूंबिय मंगळवारी (दि.१७) दुपारच्या सुमारास अल्पावधीच्या कामानिमित्त घराबाहेर पडले असता ही घरफोडी झाली. अज्ञात चोरट्यांनी आहिरे यांच्या बंद घराचे कुलूप तोडून बेडरूममधील कपाटात ठेवलेले सुमारे २ लाख ५० हजार रूपये किमतीचे दागिणे चोरून नेले असून अधिक तपास सहाय्यक निरीक्षक वायकर करीत आहेत.
ट्रॅक्टर पलटी झाल्याने शेतक-याचा मृत्यू
नाशिक (इंडिया दर्पण वृत्तसेवा)- नांगरणी करीत असतांना ट्रॅक्टर पलटी झाल्याने शेतक-याचा मृत्यू झाला. हा अपघात गिरणारे ता.जि.नाशिक येथे झाला. याप्रकरणी नाशिक तालूका पोलीस ठाण्यात मृत्यूची नोंद करण्यात आली आहे.
अरूण पंढरीनाथ थेटे (५३ रा.गिरणारे) असे मृत शेतक-याचे नाव आहे. थेटे बुधवारी (दि.११) आपल्या शेतात ट्रॅक्टरवर पैरणीपूर्वीची मशागत करीत असतांना ही घटना घडली. ट्रॅक्टरने नांगरटी करीत असतांना बांधावरून दुस-या तुकड्यात उतरत असतांना ट्रॅक्टर पलटी झाला. या घटनेत ट्रॅक्टरखाली दबले गेल्याने ते गंभीर जखमी झाले होते.
पुतण्या सागर थेटे यांनी त्यांना तातडीने गिरणारे प्राथमिक आरोग्य केंद्रात प्रथमोपचार करून अधिक उपचारार्थ जिल्हा रूग्णालयात दाखल केले असता वैद्यकीय सुत्रांनी तपासून मृत घोषीत केले.
