नाशिक (इंडिया दर्पण वृत्तसेवा)- सीबीआय अधिकारी असल्याचे भासवून भामट्यांनी शहरातील एकास तब्बल ४८ लाख रूपयाना गंडविल्याचा प्रकार समोर आला आहे. तुमच्या आधारकार्डच्या माध्यमातून राज्यातील विविध बँक खात्यात साडे आठ कोटी रूपयांची उलाढाल झाल्याची धमकी देत ही खंडणी उकळण्यात आली असून याप्रकरणी सायबर पोलीस ठाण्यात गुन्हा दाखल करण्यात आला आहे.
पोलीसांनी दिलेल्या माहितीनुसार शहरातील नागरीकाशी १४ ते २० मे दरम्यान भामट्यांनी व्हॉटसअप क्रमांकावरून संपर्क साधला होता. सीबीआयच्या मुंबई ब्रॅच मधून बोलत असल्याचे सांगून, मोहनदास नामक व्यक्तीने शहरातील नागरीकास तुमच्या आधारकार्डच्या माध्यमातून मोठ्या रकमेंची उलाढाल झाली असल्याचे धमकावले. विविध राज्यात बँक खाते उघडून त्यातून साडे आठ कोटीहून अधिक रकमेचा व्यवहार केल्याबाबत सांगितले. यावेळी भेदरलेल्या शहरातील नागरिकास मोबाईलवर सीबीआयचे लेटरपॅड असलेले पाठविण्यात आले.
त्यावर तक्रारदारावर मनी लॉंडरीग, ड्रग्ज ट्रॅफिकींग व हवाला अपराधाचे गुन्हे दाखल असल्याचे नुमुद करण्यात आले होते. घाबरून गेलेल्या नागरीकास भामट्याने वरिल खोटी माहिती सांगून बँक खात्याची माहिती मिळवली. यानंतर त्याने कारवाई टाळण्यासाठी सांगितलेल्या वॉलेट नंबर व बँक खात्यात तक्रारदारास रकमा वर्ग करण्यास भाग पाडण्यात आले आहे. या फसवणुकीत तक्रारदाराने दोन बँक खात्यातील तब्बल ४७ लाख ८७ हजार ५०० रूपयांची रक्कम संबधीताच्या बँक खात्यात वर्ग केली असून फसवणुकीचा प्रकार लक्षात येताच त्यांनी पोलीसात धाव घेतली आहे. अधिक तपास वरिष्ठ निरीक्षक ढवळे करीत आहेत.
