नाशिक (इंडिया दर्पण वृत्तसेवा)– कारचालक जावयास मारहाण करीत दुचाकीस्वाराने सासूचा विनयभंग केल्याचा प्रकार गंजमाळ सिग्नल भागात घडला. पोलीस वाहतूक नियमांचे उलंघन करणा-या मुजोर दुचाकीस्वाराच्या मुसक्या आवळल्या असून याप्रकरणी भद्रकाली पोलीस ठाण्यात गुन्हा दाखल करण्यात आला आहे.
पोलीसांनी दिलेल्या माहितीनुसार समीर हमीद शहा (३०, रा. पंचशीलनगर,गंजमाळ) असे अटक करण्यात आलेल्या संशयिताचे नाव आहे. याबाबत पीडित महिलेने तक्रार दिली आहे. सोमवारी (दि. २४) सायंकाळी ५.३० वाजेच्या सुमारास पीडित महिला, तिची मुलगी, जावई व मुलगा असे एमएच ०३ एएम ३५८७ या इनोव्हा कारमधून प्रवास करीत असतांना ही घटना घडली.
पंचवटीकडून कुटुंबिय त्यांच्या राहत्या घरी जात असताना खडकाळी सिग्नल येथे दूध बाजारकडून येणा-या दुचाकीस्वाराने सिग्नल नियमांचे उल्लंघन करत गाडी पुढे आणली. महिलेच्या जावयाने संशयिताला सिग्नल बघ असे म्हटले असता याचा राग आल्याने दुचाकी कारसमोर उभी करून त्याने रस्ता अडवला. शिवीगाळ करत महिलेच्या जावयाला मारहाण केली. महिला समजावून सांगत असताना संशयिताने तिचा विनयभंग केला. या घटनेची दखल घेत पोलीसांनी संशयिताच्या मुसक्या आवळल्या असून अधिक तपास उपनिरीक्षक तोंडे करीत आहेत.
