नाशिक (इंडिया दर्पण वृत्तसेवा) – शाळकरी मुलीसोबत लैंगिक अत्याचार केल्याप्रकरणी विशेष पोस्को न्यायालयाने एकास दोन वर्ष सश्रम कारावासाची शिक्षा सुनावली आहे. दानिश अक्रम खान (२९ रा.रेहमतनगर वडाळागाव) असे शिक्षा सुनावण्यात आलेल्या आरोपीचे नाव आहे. हा खटला अतिरिक्त जिल्हा व सत्र न्यायालय तथा विशेष पोक्सो न्यायालयाचे न्या. एस.एस.खरात यांच्या कोर्टात चालला.
सहाय्यक सरकारी अभियोक्ता एस.एस गोरे यांनी या खटल्याचे कामकाज पाहिले. ही घटना डीजीपीनगर भागात ९ ऑक्टोबर २०२१ रोजी घडली होती. आरोपीने मुलीस चारचाकीतून लॉजवर घेवून जात हे कृत्य केले होते. याप्रकरणी मुंबईनाका पोलिस ठाण्यात विनयभंग,अपहरणासह बाल लैंगिक अत्याचार प्रतिबंध कायद्यान्वये गुन्हा दाखल करण्यात आला होता. आरोपी व पीडिता एकमेकांचे परिचीत आहेत. पीडितेचा अज्ञानपणाचा फायदा उचलत आरोपीने हे कृत्य केले होते. ९ ऑक्टोबर रोजी मुलीची शाळा गाठत त्याने वडिलांनी घरी बोलावल्याचे खोटे सांगत मुलीस आपल्या चारचाकीतून एका लॉजवर नेले होते.
एका रूममध्ये तिचा विनयभंग केला होता. याप्रकरणी मुंबईनाका पोलिस ठाण्यात विविध कलमान्वये गुन्हा दाखल करण्यात आला होता. उपनिरीक्षक अंकुश जाधव यांनी या गुन्ह्याचा तपास करून पुराव्यानिशी दोषारोपपत्र न्यायालयास सादर केले होते. फिर्यादी,साक्षीदार व पंच यांनी दिलेली साक्ष आणि तपासी अधिका-यांनी सादर केलेल्या परिस्थितीजन्य पुराव्यास अनुसरून न्यायालयाने आरोपीस दोषी ठरवत आरोपीस ही शिक्षा सुनावली.
Nashik Crime Court Sexual Abuse Sentence