नाशिक (इंडिया दर्पण वृत्तसेवा) – समतानगर भागात पूर्व वैमनस्यातून एकाने महिलेचे घर व दुचाकी पेटवून दिल्याची घटना घडली. पंकज मोरे असे महिलेचे घर पेटवून देणा-या संशयिताचे नाव आहे. याप्रकरणी सुशिला प्रेम चव्हाण (रा.सोनवणे बाबा चौक. समतानगर ) यांनी तक्रार दाखल केली असून उपनगर पोलिस ठाण्यात गुन्हा दाखल करण्यात आला आहे.
संशयित आणि महिला एकाच भागात राहणारे असून त्यांच्या पूर्ववैमनस्य आहे. रविवारी (दि.१५) रात्री संशयिताने मागील वादाची कुरापत काढून तिला शिवीगाळ व दमदाटी केली होती. त्यानंतर या वादावर पडदा पडला असता संशयिताने मध्यरात्री महिलेचे घर नष्ट करण्याच्या उद्देशाने पार्क केलेली एमएच १५ एच पी ६३७४ या दुचाकीवर आणि घराच्या पत्र्यावर ज्वलनशिल पदार्थ टाकून पेटवून दिले. ही बाब निदर्शनास येताच स्थानिकांनी धाव घेत आगीवर नियंत्रण मिळविल्याने अनर्थ टळला. या घटनेत दुचाकीसह घरावरील प्लॅस्टिक पत्रे तसेच टाटा स्काय डिश जळून खाक झाली. अधिक तपास उपनिरीक्षक पाटील करीत आहेत.