नाशिक (इंडिया दर्पण वृत्तसेवा) – निमाणी बसस्थानकात बसचे चाक पायावरून गेल्याने प्रवासी तरूण जखमी झाल्याची घटना घडली. रोहिदास दत्तू उर्फ दत्तात्रेय शिंदे (३० रा.कोणार्क नगर,आडगाव) असे जखमी प्रवाश्याचे नाव आहे. जखमी शिंदे यांच्यावर उपचार सुरू असून याप्रकरणी पंचवटी पोलिस ठाण्यात बसचालकाविरूध्द गुन्हा दाखल करण्यात आला आहे. शिंदे गुरूवारी (दि.२२) सायंकाळच्या सुमारास घरी जाण्यासाठी निमाणी बसस्थानकात गेले होते. कोणार्क नगर बसची ते प्रतिक्षा करीत असतांना ही घटना घडली. आवारात ते उभे असतांना पार्क केलेल्या सीटी लिंक बस अचानक चालकाने मागे घेतल्याने हा अपघात झाला. बसमागे उभे असतांना चालकाने आपले वाहन मागे घेत पुढे दामटले या घटनेत बसचे चाक शिंदे यांच्या उजव्या पायावरून गेल्याने ते जखमी झाले असून चालक आपल्या वाहनासह पसार झाला आहे. याप्रकरणी शिंदे यांचे भाऊ सचिन शिंदे यांनी दिलेल्या तक्रारीवरून एमएच १५ जीव्ही ७९७४ या बसवरील चालकाविरूध्द अपघाताची नोंद करण्यात आली असून अधिक तपास हवालदार सोर करीत आहेत.
